Atyraýda 16 jasar jasóspirim mektepke bomba qoıylǵany týraly jalǵan habar bergen
ATYRAÝ. QazAqparat – Atyraýda 16 jasar jasóspirim mektepke bomba qoıylǵany týraly jalǵan habar bergen, dep habarlaıdy QazAqparat.
Oblystyq polıtsııa departamenti baspasóz qyzmetiniń aqparatyna qaraǵanda, 5 naýryzda mektepterdiń biriniń elektrondy poshtasyna saǵat 08:52 shamasynda belgisiz adamnan hat túsken.
Hatta mektepke jarylǵysh zat qoıylǵany týraly jazylǵan. Bul týraly mektep basshylyǵy jedel basqarý ortalyǵyna habarlaǵan.
«Polıtsııa qyzmetkerleri mektepte jedel tekserý jumystaryn júrgizdi. Tekserý nátıjesinde jarylǵysh zat tabylmady. Jalǵan habar jibergen 16 jastaǵy jasóspirim anyqtaldy. Onyń aıtýynsha, senbi kúni úıinde otyryp, qaljyń úshin jarylǵysh zat qoıylǵany týraly jazǵan. Qazir jasóspirim anasymen birge polıtsııaǵa jetkizilip, tergeýge alyndy», - dep habarlady departamenttiń baspasóz qyzmeti.
Atalǵan derekke qatysty is qujattary QR Qylmystyq kodeksiniń 273-babymen (Terrorızm aktisi týraly kórineý jalǵan habarlaý) sotqa joldandy.
