Atyraýda 16 jasar qyzdy izdestirip jatqan súńgýirler jumysty toqtatýǵa májbúr boldy
Atyraý oblystyq tótenshe jaǵdaılar departamenti qoǵammen baılanys tobynyń málimetinshe, 16 jasar qyz 6 sáýirde iz-túzsiz joǵalyp ketken.
«Jasóspirim qyz ata-anasyna eskertpeı, úıinen shyǵyp ketip, qaıta oralmaǵan. Departamenttiń dıspetcherlik pýltine 7 sáýirde 2007 jylǵy jasóspirimniń joǵalǵany týraly habar tústi. Sol kúnnen beri jedel qutqarý jasaǵynyń qutqarýshylary kámeletke tolmaǵan jasóspirim qyzdy izdestirip jatyr. Ázirge izdeý jumystary nátıje bergen joq», - dep habarlady departamenttiń qoǵammen baılanys toby.
Іzdestirý jumystaryna jedel-qutqarý jasaǵynyń kınologııalyq esebi, 14 qutqarýshy, 4 júzý quraly tartylǵan. Sondaı-aq, jasóspirimniń týystary, eriktiler men jergilikti turǵyndar Jaıyq ózeniniń jaǵalaýyna barlaý jumystaryna kómektesken.
«Osy kezge deıin jedel-qutqarý jasaǵynyń súńgýirleri Jaıyq ózeniniń 730 sharshy metrden astam aýmaǵynda sý astynan izdeýdi júrgizdi. Alaıda, búgin, 19 sáýirde Jaıyq ózeninde sý deńgeıiniń kóterilýine, aǵystyń jyldamdyǵy men jel ekpininiń kúsheıýine baılanysty izdestirý toqtatyldy. Óıtkeni, súńgýirlerge ózen aǵysynyń jyldamdyǵy sekýndyna 2 metr bolǵanda izdestirýdi júrgizýge ruqsat etiledi. Qazir Jaıyq ózenindegi sý aǵysynyń jyldamdyǵy – sekýndyna 3,5-4 metr», - dep málim etti qoǵammen baılanys tobynan.
Sondaı-aq, ózendegi keri aǵys pen sý astynda bógde zattardyń kóp kezdesýi, kóriný deńgeıiniń tómendigi qıyndyq týdyrǵan.
Eske sala ketelik, budan buryn Atyraýda 16 jastaǵy qyz tabylmaı jatqanyn, keıin jańa málimetter belgili bolǵanyn jazǵan edik.
