Atyraýda 16 mıgrant kópqabatty úıdiń qurylysyna zańsyz tartylǵan

ATYRAÝ. QazAqparat – Atyraý oblysynda zańsyz jumys istep júrgen 16 sheteldik ustaldy, dep habarlaıdy QazAqparat.

Oblystyq Polıtsııa departamenti baspasóz qyzmetiniń málimetinshe, óńirde «Zańsyz kelýshi-2021» jedel-profılaktıkalyq is-sharasy ótip jatyr.

«Іs-shara kezinde Atyraý qalasynda ornalasqan «Káýsar» turǵyn úı kesheniniń qurylys aýmaǵynda jumys isteýge arnalǵan ruqsat qaǵazdaryn rásimdemeı, zańsyz qyzmet etken sheteldikter anyqtaldy. Qazir Ózbekstan Respýblıkasynyń 16 azamaty jeke basy anyqtalǵanǵa deıin Atyraý qalalyq polıtsııa basqarmasynyń qabyldaý-taratý ornyna ornalastyryldy», - dep habarlady departamenttiń baspasóz qyzmetinen.

Eske sala keteıik, budan buryn Atyraýda kóshi-qon zańnamasyn buzǵan 61 sheteldik elden shyǵarylǵan bolatyn.