Atyraýda 150 oryndyq jataqhana paıdalanýǵa berildi
ATYRAÝ. QazAqparat – Atyraýda Astana kúni qarsańynda S.Muqashev atyndaǵy joǵary polıtehnıkalyq kolledjiniń jataqhanasy paıdalanýǵa berildi, dep habarlaıdy QazAqparat tilshisi.
Oblys ákimi Mahambet Dosmuhambetovtiń aıtýynsha, jańa jataqhana Elbasynyń «Bes áleýmettik bastama» baǵdarlamasyn iske asyrý aıasynda salynǵan.
«Elimizle álemdik standarttarǵa sáıkes bilim berýdi qalyptastyrý úshin stýdentterge qolaıly jaǵdaı jasaý qolǵa alynyp otyr. Budan bylaı 150 oryndyq jataqhanaǵa ornalasqan polıtehnıkalyq kolledjdiń stýdentteri alańsyz bilim alady», - dedi oblys ákimi Mahambet Dosmuhambetov.
Kolledj dırektory Baǵyt Sherkeshbaevanyń málimetinshe, bes qabatty jataqhananyń jalpy aýdany – 720 sharshy metr. Jataqhananyń «A» blogyndaǵy 125 orynǵa stýdentter ornalasady. Al, «V» blogyndaǵy 25 oryn oqytýshylarǵa arnalǵan
«Bólmeler sektsııalarǵa bólingen. Ár qabatta oqý bólmeleri, as úı, ashana, kir jýýǵa, kıim útikteýge arnalǵan bólmeler, ústel oıyndarynyń buryshy ornalasqan. Al,birinshi qabatta fıtnes-zal, ıoga zaly, kitaphana, demalys bólmesi, ınternetke qosylǵan kovorkıng-ortalyq ornalasqan. Jataqhanada qaýipsizdik úshin beınebaqylaýmen jabdyqtaldy» -deıdi Baǵyt Sherkeshbaeva.
Jataqhanaǵa alǵashqylardyń qatarynda ornalasqan stýdenttiń biri – Saıpolla Bektas. Qazir ІІІ kýrsta oqıtyn Isataı aýdanynan kelgen.
«Eki jyl boıy páter jaldap turdym. Páter jaldaý úshin aı saıyn 70 myń teńge tóledik. Endi kolledjdiń janynan salynǵan jataqhanada turamyn. Jataqhananyń jaılylyǵy unady. Bos ýaqytymda sportpen shuǵyldaný múmkindigi bar» - dep qýanyshymen bólisti S.Bektas.
Jataqhananyń qurylysyn «AS-Stroı» JShS júrgizgen. Seriktestik dırektorynyń orynbasary Nurlan Dılhanovtyń aıtýynsha, ǵımarattyń jalpy quny 670 mıllıon teńgeni quraıdy.
Eske sala ketelik, budan buryn Atyraý oblysynda úsh kolledjdiń jataqhanasy paıdalanýǵa berilgenin habarlaǵan bolatynbyz.
