Atyraýda 13 jastaǵy qyzdy zorlamaq bolǵan kúdiktige qatysty jańa derekter aıtyldy

ATYRAÝ. QazAqparat – Atyraýda 13 jasar qyzdy zorlamaq bolǵan kúdiktini ustaýǵa qatysty jańa derek aıtyldy, dep habarlaıdy QazAqparat.

Oblystyq polıtsııa departamentiniń baspasóz qyzmetinen málim etkendeı, búgin, 6 jeltoqsanda saǵat 11:31-de Atyraý qalalyq polıtsııa basqarmasynyń kezekshi bólimine «Renault duster» markaly avtokóligi urlanǵany týraly derek túsken.

Áıel adam kólikpen dúkenge barǵan. Qyzyn kólikte qaldyryp, ózi dúkenge kirip ketken. Dúkennen shyqqanda kóligin tappaı qalǵan.

Patrýldik polıtsııa basqarmasynyń qyzmetkerleri urlanǵan kólikti Atyraý qalasyndaǵy «Avangard» shaǵynaýdanynan tapqan. Kólikti 1988 jylǵy er adam urlap áketken.

Polıtseıler kóliktiń júk salǵysh bóliginen kúdiktini ustaǵan. Sol kezde kúdiktiniń ústinde kıimi bolmaǵan.

Al, kólik salonynda 13 jasar jasóspirim bolǵany anyqtalǵan. Jasóspirim qyzǵa tserebraldy sal aýrýy dıagnozy qoıylǵan.

Qazir atalǵan derekke qatysty QR Qylmystyq kodeksiniń 200-babynyń 1-bóligimen (Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý) sotqa deıingi tergeý bastaldy.

Іs qujattary oblystyq polıtsııa departamentine berildi. Sondaı-aq, qylmystyq isti QR Qylmystyq kodeksiniń 24-babymen (Qylmysqa daıyndalý jáne qylmysqa oqtalý) jáne 120-babynyń 3-1-bóligimen (Zorlaý) tirkeý máselesi sheshilip jatyr.

Eske sala ketelik, buǵan deıinAtyraý turǵyny 13 jasar qyzdy zorlamaq boldy degen kúdikpen ustalǵanyn habarlaǵan edik.