Atyraýda 12 jasar bala Jaıyq ózenine batyp ketti

ATYRAÝ. QazAqparat – Atyraýda 12 jasar jasóspirim Jaıyq ózenine batyp ketti, dep habarlaıdy QazAqparat tilshisi.

Oblystyq tótenshe jaǵdaılar departamenti qoǵammen baılanys tobynyń málimetinshe, oqıǵa búgin, 7 shildede bolǵan.

«Kúndizgi saǵat 13:16 shamasynda 12 jastaǵy jasóspirim Jaıyq ózeniniń arnaıy jabdyqtalmaǵan tusynda sýǵa shomylǵan. Alaıda, jetkinshek sýdan qaıta shyqpaı qalǵan. Jedel qutqarý jasaǵynyń 3 qutqarýshysy oqıǵa ornyna jedel jetip, ózenge batqan jasóspirimdi izdestirýdi bastady. Jergilikti ýaqytpen saǵat 14:54-te balanyń máıiti sýdan shyǵaryldy», -dep habarlady departamenttiń qoǵammen baılanys toby.

Bıyl sý aıdyndarynda shomylý kezeńi burynǵydan 15 kúnge kesh bastaldy. Oǵan Jaıyq ózenindegi sý deńgeıi turaqtamaǵany sebep bolǵan.

«Atyraý oblysynda shomylýǵa arnalǵan 6 jaǵajaı bar. Onyń ishinde Atyraý qalasynda 3, Jylyoı aýdanynda 2 jáne Inder aýdanynda 1 jaǵajaı ornalasqan», -dep málim etti qoǵammen baılanys tobynan.

Eske sala ketelik, budan buryn Atyraý oblysy sý aıdyndarynda shomylýǵa qaýipti 70 ýchaske baryn jazǵan edik.

Sý aıdyndarynda shomylýǵa tyıym salynǵan 70 qaýipti ýchaske anyqtaldy. Onyń ishinde Atyraý qalasynda 17, Inder aýdanynda 10, Mahambette – 19, Qurmanǵazyda – 2, Jylyoıda – 7, Qyzylqoǵada aýdanynda 15 qaýipti ýchaske bar.

Sondaı-aq, Atyraýda aǵaıyndy jasóspirimder Jaıyq ózenine batyp ketti.

Keıin Jaıyqqa batqan aǵaıyndy jasóspirimderdiń biriniń denesi tabylǵan edi.