Atyraýda 12 jasar bala oıyn-saýyq ortalyǵynda bıikten qulap jaraqattandy
Oqıǵa keshe, 28 naýryzda «Atyraý» saýda-oıyn-saýyq ortalyǵynda bolǵan. Ortalyqtaǵy balalar alańynda oınap júrgen 12 jasar jetkinshek bıikten qulap ketken. Bul derekti oblystyq polıtsııa departamentiniń baspasóz qyzmeti rastady. Oqıǵa ornyna jedel járdem brıgadasy shaqyrylǵan.
«Oınap júrgen bala abaısyzda 5-6 metr bıikten qulaǵan. Ol sol aıaǵyndaǵy tobyq býyny tusynan jabyq jaraqat alǵan. Balaǵa alǵashqy medıtsınalyq kómek kórsetilip, oblystyq balalar aýrýhanasynyń travmatologııa bólimshesine jetkizildi», - dep habarlady oblystyq jedel járdem stantsııasy dırektorynyń orynbasary Nargız Baımoldaeva.
Oblystyq balalar aýrýhanasynyń dárigerleri balanyń densaýlyǵyna medıtsınalyq tekserý júrgizgen. Sodan keıin aýrýhanaǵa jatqyzýdyń qajettiligi týyndamaǵandyqtan, bala úıine jiberilgen.
«Atalǵan derekke qatysty balanyń ata-anasynan eshqandaı aryz túsken joq. Oqıǵaǵa baılanysty jınaqtalǵan is qujattary oblystyq memlekettik eńbek ınspektsııasy basqarmasyna joldandy», - dep málim etti deparatmenttiń baspasóz qyzmeti.
Eske sala ketelik, buǵan deıin Atyraý oblysynda kanal sýyna qulaǵan eki balanyń biri mert bolǵanyn jazǵan edik. Olar bir otbasynyń balalary bolyp shyqty. Qurmanǵazy aýdanynyń Birlik aýyldyq okrýginde turatyn bir otbasynyń aǵaly-inili eki balasy oınap júrip, abaısyzda Şýche kanalynyń shuńqyryna qulap ketken. Kanal sýyna, aldymen 2016 jylǵy inisi batqan. Onyń qulaǵanyn kórgen 10 jasar aǵasy qutqarmaq bolyp, sýǵa sekirgen.
