Atyraýda 11 kolledj PlatonusCollege elektrondyq júıesine qosylady
ATYRAÝ. QazAqparat - Atyraý oblysynda 118 myń 100 bala mektepke barady. Bul týraly dástúrli tamyz konferentsııasy kezinde aıtyldy, dep habarlaıdy QazAqparat tilshisi.
Bilim basqarmasynyń basshysy Qaıyrǵalı Kenjeǵalıev oqý oryndarynyń jańa oqý jylyna daıyndyǵy týraly aıtty.
«Jańa oqý jylynda 118 myń 100 bala partaǵa otyrady. Onyń ishinde birinshi synypta 15 myń 275 bala bar. Bilim berý mekemelerine mektep oqýlyqtary men oqý quraldaryn berý úshin jergilikti bıýdjetten 2 mlrd 540 mln teńge bólindi», - dedi Qaıyrǵalı Kenjeǵalıev.
Oblystyń bas muǵalimi oqý jylynyń basynda oblystaǵy bilim mekemelerin daıyndaýdyń mańyzyn atap ótti. Aǵymdaǵy jyly 186 mektepti aǵymdaǵy jóndeýge 328,2 mln teńge jáne kúrdeli jóndeýge 2 mlrd teńgeden astam qarjy bólindi. 18 bilim berý mekemesinde jóndeý jumystary júrgizildi.
«Bıyl 23 bilim mekemesinde qurylys júrgizilýde. 1 qyrkúıekke deıin eki mektep pen úsh balabaqsha ashylady dep kútilýde. Qalǵandaryn jyldyń aıaǵyna deıin paıdalanýǵa beremiz», - dep atap ótti Qaıyrǵalı Kenjeǵalıev.
Búgingi tańda oblystaǵy 193 jalpy bilim beretin mekteptiń 172-si keń jolaqty ınternetke qosylǵan.
Aımaqta bilim berýdi tsıfrlandyrý baǵdarlamasy aıasynda «jol kartasy» ázirlendi. Bul jumys oblystyń kásiptik-tehnıkalyq kolledjderinde júrgiziledi. Búgingi tańda bir kolledj «PlatonusCollege» avtomattandyrylǵan elektrondyq júıesine qosylǵan. Jaqyn arada osy júıege taǵy 11 kolledjdi qosý josparlanyp otyr. Bul júıe stýdentterdi oqý oryndaryna qabyldaý úderisin avtomattandyrady jáne oqý protsessiniń júıesin jáne oqý úrdisin baqylaýdy jeńildetedi.
Konferentsııaǵa QR Bilim jáne ǵylym mınıstrligi balalar quqyqtaryn qorǵaý komıtetiniń tóraǵasy Nurbek Orshýbekov, Nazarbaev Zııatkerlik mektebiniń dırektory Janbota Qabdyqarımov, Batys Qazaqstan memlekettik medıtsına ýnıversıtetiniń rektory Erbol Bekmuhambetov qatysty.
Baıandamashylar Qazaqstanda engiziletin oqytýdyń jańa formalary, Nazarbaev zııatkerlik mektebiniń tájirıbesi, úsh tilde bilim berý júıesi týraly aıtyp berdi.
Atyraý oblysynyń ákimi Nurlan Noǵaevtyń aıtýynsha, bilim berý salasynda úlken jumystar atqaryldy.
«Ekonomıkany damytý úshin bizge kásibı kadrlar qajet. Memleket basshysy bul mindetti aldymyzǵa qoıyp otyr. Qazirdiń ózinde joǵary bilikti mamandarǵa degen qajettilik artyp keledi. Olar mektep kezinen bastap daıyndalýy kerek. Bul - sizder úshin mańyzdy mindet. Biz bilim berý salasynda týyndaıtyn barlyq máselelerdi jyldam sheshýge tyrysamyz. Jańa mektepter, balabaqshalar salynyp jatyr, oblysqa qajetti mamandardy tartý boıynsha jumystar júrgizilýde. Sizderge jas urpaqpen jumys isteýde alǵa qoıylǵan mindetterdi júzege asyrý úshin barlyq jaǵdaı jasalǵan», - dedi Nurlan Noǵaev.
Sondaı-aq, oblys ákimi oblystyń pedagogıkalyq ujymyna jańa oqý jylynda shyǵarmashylyq tabys pen jemisti eńbek tiledi. Konferentsııa aımaqtyń úzdik oqytýshylaryn marapattaý rásimimen aıaqtaldy. Oblystyń birqatar oqý oryndarynyń basshylary men qyzmetkerleri tósbelgiler men dıplomdarmen marapattaldy.
