Atyraýda 11 brakoner ustaldy
ATYRAÝ. QazAqparat - Atyraý oblysynda brakonerlik áreketterge qarsy kúreske baǵyttalǵan «Bekire-2017» operatsııasynyń kúzgi kezeńi bastalyp, 11 adam tutqyndalǵan, dep habar beredi «QazAqparat» HAA tilshisi.
«UQKD, polıtsııa jáne orman sharýashylyǵy jáne janýarlar álemi aýmaqtyq ınspektsııasynyń qyzmetkerleri Kaspıı teńiziniń jaǵalaýlarynan zańsyz balyq aýlaýda paıdalanylǵan 20 júzý quralyn tapqan. Olardyń ıeleri bılik ókilderine aıtarlyqtaı qarsylyq kórsetken. 11 adamǵa QR Ákimshilik quqyqbuzýshylyq kodeksiniń 667-babynyń (Quqyq qorǵaý organy nemese arnaýly memlekettik organ, áskerı polıtsııa organy qyzmetkeriniń (áskerı qyzmetshisiniń), sot prıstavynyń, sot oryndaýshysynyń zańdy ókimine nemese talabyna baǵynbaý) 1-bóligi boıynsha ákimshilik hattama toltyryldy. Isataı aýdandyq sotynyń qaýlysymen 11 adam aıypty dep tanylyp, olarǵa 3 táýlikke ákimshilik qamaý jazasyn qoldaný týraly sheshim shyǵaryldy», - deıdi Atyraý oblystyq prokýrory Ernat Sybanqulov.
Júzý quraldary aıyp turaǵyna alynǵan.
Budan tys, prokýratýradaǵylardyń aıtýynsha, «Toyota Surf» markaly avtokóliginiń júksalǵyshynan 3 bekire jáne 2 qap chastık balyǵy tabylǵan. Osy fakti Qylmystyq kodekstiń 339-baby boıynsha sotqa deıingi tergep-tekserýdiń biryńǵaı tizilimine tirkelgen.
