Atyraýda 11,3 mlrd teńgege sport-ınternat kesheni salynady
Oblystyq Dene shynyqtyrý jáne sport basqarmasynyń baspasóz qyzmetinen málim etkendeı, ınternat qurylysyna jer telimi bólingen.
«Jańa sport ınternatynyń qurylysy Atyraý qalasyndaǵy Nursaıa shaǵynaýdanynda salynady. Qurylys jumystary 2023-2025 jyldary júrgiziledi. Nysannyń jalpy quny 11 mlrd 34 mln 887 myń teńgeni quraıdy», - dep habarlady basqarmadan.
Jobaǵa sáıkes ınternat 900 balaǵa eseptelgen.
Internat qurylysynda tutas keshen josparlanyp otyr. Keshen aýmaǵynda 300 oryndyq oqý korpýsy, 250 orynǵa eseptelgen jataqhana, 75 oryndyq qonaq úı salynady.
Sondaı-aq 1 myń kórermenge arnalǵan sport kesheni boı kóteredi.
«Bul ınternatta sporttyń birneshe túrin damytý kózdelgen. Ásirese, sambo, dzıýdo, erkin kúres, boks, fýtbol, voleıbol, basketbol sekildi buqaralyq sport túrlerin, sondaı-aq ulttyq kúresti jandandyrýǵa basymdyq beriledi. Internat iske qosylǵanda 400 jańa jumys orny ashylady», - dep málim etti vedomstvonyń baspasóz qyzmetinen.
Eske salaıyq, budan buryn Atyraýlyq dzıýdoshy qyzdar Azııa chempıonatynan bir altyn, bir kúmis medal alǵanyn jazǵan bolatynbyz.
