Atyraýda «103» nómirine soǵylǵan qońyraý Aqtaýǵa túsip ketip jatyr
ATYRAÝ. QazAqparat - Atyraýda mobıldik telefonnan «103» jedel járdem qyzmetine habarlaspaq bolǵandardyń qońyraýy Mańǵystaý oblysynyń Aqtaý qalasyna túsip ketip jatyr, dep habarlaıdy «QazAqparat» HAA tilshisi.
«103» qyzmetin shaqyrýǵa baılanysty týyndaǵan máselege baılanysty oblystyq baılanys pen avtomatızatsııa ınspektsııasyna, «Qazaqtelekom» AQ men «Ksell» AQ-na týyndaǵan jaǵdaıdy retke keltirý boıynsha hat joldandy.
Mańǵystaý oblysy Aqtaý qalasynyń jedel medıtsınalyq qyzmetiniń qalalyq ınstantsııasynyń bas dárigerimen sóılesip, jumys kelisildi. Atyraý halqynan túsken ár qońyraý boıynsha Atyraýdaǵy dıspetcherlik qyzmetke aqparat beriletin bolady. Osylaısha, habarlasqan adamǵa qaıta qońyraý shalyp, mekenjaı anyqtalyp, shaqyrý sebebi pysyqtalatyn bolady», - dep habarlady «Atyraý oblystyq jedel járdem qyzmeti stantsııasy» KMQK baspasóz qyzmetinen.
Atalǵan másele áleýmettik jelide qyzý talqylanyp jatyr. Qoldanýshylar esinen tanyp qalǵan jigitke kómektesý úshin jedel járdem qyzmetin shaqyrýda qalaı áýrege túskenderin jazýda. Shalǵan qońyraýlaryna Mańǵystaý oblysynyń dıspetcherleri jaýap bergen. Jelidegi pikirlerge súıensek, mundaı máseleniń baıqalǵanyna birshama ýaqyt bolyp qalǵan.
