Atyraýda «103» nómirine qońyraý shalýshylar sany eki ese tómendegen
ATYRAÝ. QazAqparat - Koronavırýstyń jeńil túrine jáne vırýstyq ınfektsııalarǵa shaldyqqan naýqastardan bólek, oblys turǵyndary da dárigerler keńesin onlaın rejımde ala alady, dep habarlaıdy Atyraý oblystyq kommýnıkatsııalar qyzmeti. ⠀
Oblystyq jedel járdem qyzmeti stansasy dırektorynyń mindetin atqarýshy Nargız Baımoldaevanyń aıtýynsha, qazirgi ýaqytta 103 nómiri boıynsha call-ortalyqqa habarlasýshylar sany edáýir tómendegen.
«20 maýsymnan bastap qońyraý shalýshylar kóp boldy, táýligine 1300 qońyraý kelip túsetin. Al qazir olardyń sany - shamamen 720-730. Onyń 300-ge jýyǵy - aýdan turǵyndarynan. Osylaısha kelip túsetin qońyraýlar 25 paıyzǵa azaıyp, onlaın-konsýltatsııa sany da kemidi. Habarlasýshylardyń kóbi - dene qyzýy kóterilip, koronavırýs ınfektsııasynyń belgileri bar-joǵyn anyqtaǵysy keletinder, sondaı-aq, mundaı jaǵdaıda ne isteý kerek, qaıda baryp, qandaı em qabyldaý qajettigin suraıtyn azamattar», - deıdi oblystyq jedel járdem qyzmeti stansasy dırektorynyń mindetin atqarýshy Nargız Baımoldaeva.
Aıta keteıik, call-ortalyqtaǵy mamandar turǵyndarǵa qandaı sımptomatıkalyq em qabyldaý kerektigin, qansha ýaqyt, qandaı dári-dármekti ishý jaıynda túsindirý jumystarymen aınalysady jáne keńes beredi.
Búginde atalmysh ortalyqta 36 tájirbıeli maman qyzmet etedi. Olar 4 aýysymda, táýligine 24 saǵat jumys isteıdi.
