Atyraýda «103» nómirine qońyraý shalý ýaqytsha toqtatyldy
Atyraý oblystyq Densaýlyq saqtaý basqarmasy baspasóz qyzmetiniń málimetinshe, «Kómek» avtomattandyrylǵan júıesindegi aqaýlarǵa baılanysty «103» pýltine qońyraý shalý ýaqytsha múmkin emes.
«Búgin, 28 jeltoqsan kúni tańǵy 08:00-den bastap tehnıkalyq aqaýlarǵa baılanysty «103» nómiri qońyraý qabyldaı almaıdy. Qysqa merzimde júıeniń barlyq tehnıkalyq kemshiligi joıylady. Sodan soń «103» qyzmeti qalypty rejımde jumys isteıtin bolady», - dedi basqarmanyń baspasóz qyzmetinen.
Atyraý oblysynyń turǵyndary jelidegi tehnıkalyq aqaýǵa baılanysty ýaqytsha 95-67-72, 95-67-67, 51-94-64 jáne 30-63-00 telefon nómirlerine habarlasa alady.
Eske salaıyq, budan buryn Atyraýda jedel járdem stansasyna 20 jańa kólik berilgenin habarlaǵan bolatynbyz.
Atyraý oblysy ákiminiń orynbasary Jasulan Bısembıevtiń aıtýynsha, jańa jedel járdem kólikteri sanıtarlyq kólik parkin jańartýǵa baılanysty Jol kartasyn oryndaý maqsatynda alynǵan.
«Memleket basshysynyń tapsyrmasyna sáıkes medıtsına salasyndaǵy materıaldyq-tehnıkalyq bazany nyǵaıtýǵa erekshe kóńil bólinip otyr. Ásirese, halyqtyń ómirin saqtaýda úlken yqpaly tıetin jedel járdem qyzmetiniń jedeldigin arttyrýdyń mańyzy zor. Oblystyq jedel járdem qyzmetiniń jańa kóliktermen tolyǵýy atalǵan stansa brıgadalarynyń jedeldigin arttyrady», - deıdi Jasulan Bısembıev.
Qazir oblystyq jedel járdem stansasynyń balansynda 65 qyzmettik kólik bar. Al jańadan berilgen zamanaýı avtokólikter naýqasqa alǵashqy kómek kórsetýge arnalǵan qajetti qural-jabdyqtarmen qamtamasyz etilgen.