Atyraýda 100 shaqyrymǵa jýyq jol salynady
ATYRAÝ. QazAqparat - Bıyl Atyraýda 100 shaqyrymǵa jýyq jol salynady. Buǵan qosa uzyndyǵy 71 shaqyrym bolatyn 141 kóshege jol qurylysyn júrgizý úshin jobalaý-smetalyq qujattama daıyndalyp jatyr, - dep habarlaıdy QazAqparat tilshisi.
Bul týraly halyq aldynda esep berý kezdesýinde Atyraý qalasynyń ákimi Alımuhammed Quttumuratuly aıtty. Qala basshysynyń aıtýynsha, 2018 jyly Atyraýda jáne qala aýmaǵyna qarasty eldimekenderde jalpy uzyndyǵy 200,9 shaqyrym bolatyn 268 kóshege tas jol tóselgen. Bıyl jol ınfraqurylymyn qurý boıynsha jumystar jalǵasyn tabady.
«2019 jyly jalpy uzyndyǵy 99,5 km quraıtyn 104 kóshege tas jol tóseý josparlanyp otyr. Sonymen qatar, oblys ortalyǵy men irgeles eldimekenderdegi uzyndyǵy 71,2 shaqyrym bolatyn 141 kósheniń jol qurylysyna jobalaý-smetalyq qujattama daıyndalý ústinde»,-dedi Atyraý qalasynyń ákimi.
Bıyl uzyndyǵy 207 shaqyrymdy quraıtyn 205 kóshege jaıaý júrginshiler jolyn salý úshin jobalaý-smetalyq qujattama ázirleýge ashyq elektrondy konkýrsqa ótinish berildi.
2018 jyly Baımuhanov, Taımanov, Vladımırskıı kóshelerin qaıta jańǵyrtýdan ótkizip, keńeıtý kezinde zamanaýı úlgidegi 23 dana avtobýs aıaldamasy ornatyldy.
Vladımırskıı-Qurmanǵazy, Vladımırskıı-Ǵumarov, Vladımırskıı-Sátpaev, Sátpaev-Ernııazov, Sátpaev-Taımanov kóshelerinde avtokólik quraldarynyń qozǵalysy aǵynyn azaıtý maqsatynda «oń jaq burylys» joly tóseldi.
«Sondaı-aq qaladaǵy basty 11 kósheni jáne qala aýmaǵyna qarasty Atyraý-Inder avtojolynyń 10 shaqyrym bóligin qaıta jańǵyrtyp, keńeıtýdi josparlap otyrmyz»,-dep naqtylady Alımuhammed Quttumuratuly.
Atyraý qalasynyń ákimi bıyl Bereke yqsham aýdanyndaǵy jol qozǵalysyn retteý, kólik keptelisin azaıtý maqsatynda jol aıryǵy qurylysy júrgiziletinin de atap ótti.
