Atyraýda 10 jyl buryn qurylysy bastalǵan kontsert zaly buzylatyn boldy
Prezıdent byltyr Atyraýǵa kelgen saparynda 10 jyl buryn salyna bastaǵan Kontsert zaly áli paıdalanýǵa berilmenin synaǵan bolatyn.
«Men Atyraý qalasynda daryndy jastar úshin mádenıet jáne shyǵarmashylyq ortalyǵyn salýdy tapsyramyn. Ony qazaq kúı óneriniń alyby –Qurmanǵazynyń atymen ataýdy usynamyn. Atyraý árbir turǵynǵa qolaıly, taza, zamanaýı qalaǵa aınalýǵa tıis. Qalada keıbir nysandardyń qurylysy kóp jyldan beri toqtap tur. Mysaly, 10 jyl buryn salyna bastaǵan Kontsert zaly áli paıdalanýǵa berilgen joq. Tipti, onyń ǵımaraty jaramsyz kúıge tústi. Úkimet ákimdikpen birlesip, osyndaı nysandardy salyp bitirý máselesin birjola sheshýge tıis. Qajet bolsa, ınvestorlardy tartyńyzdar. Halyq mundaı ǵımarattardyń ıgiligin kórýi qajet», - degen edi jıynda Qazaqstan Prezıdenti.
Endi Prezıdent synyna ilingen kontsert zalynyń ǵımaraty buzylatyn boldy. Bul nysannyń qurylysy on jyldan beri toqtap tur.
Oblystyq qurylys basqarmasynyń basshysy Nurbergen Qusaıynovtyń málimetinshe, kontsert zalynyń tehnıkalyq jaǵdaıyna saraptama júrgizilgen. Saraptamanyń nátıjesinde metaldy jáne temirbetondy konstrýktsııalardyń jaramsyzdyǵy týraly qorytyndy berilgen.
«Kontsert zalynyń ǵımaraty tolyqtaı buzylady. Onyń ornyna qaıtadan jańa kontsert zaly turǵyzý josparlanyp otyr. Ǵımarattyń janynan murajaı salynady. Qazir «BI Group» kompanııasymen eskızdik jobasy jasaqtalyp jatyr. Barlyǵy arnaıy daıyndalyp jatqan jobadan keıin belgili bolady. Nysannyń sol aýmaǵy qala ma, joq pa, bul da naqtylanady», -dep habarlady Nurbergen Qusaıynov.
Eske sala ketelik, buǵan deıin Atyraýda qurylysy toqtaǵan kontsert zalynyń ornyna mádenıet ortalyǵy salynatynyn jazǵan edik.