Atyraýda 10 jasar balanyń aıaǵy sýburqaqtyń qubyryna qysylyp qalǵan
Atyraý oblystyq tótenshe jaǵdaılar departamenti qoǵammen baılanys tobynyń aqparatyna súıensek, oqıǵa 20 maýsymda bolǵan.
«On jasar bala qatarlastarymen birge jergilikti ýaqytpen tańerteńgi saǵat 8:00 shamasynda Atyraý qalasynyń «Vokzal mańy» shaǵyn aýdanynda ornalasqan sýburqaqqa oınaýǵa kelgen. Sol kezde onyń aıaǵy sýburqaqtyń sý tógetin qubyryna qysylyp, jasóspirim aıaǵyn shyǵara almaı qalǵan. Osyǵan baılanysty onyń ata-anasy qutqarýshylardyń kómegine júgindi», - dep habarlady departamenttiń qoǵammen baılanys toby.
Oqıǵa ornynan jedel jetken qutqarýshylar arnaıy qutqarý quralymen balanyń aıaǵyn temir turbalar arasynan shyǵardy. Balaǵa eshqandaı zaqym kelgen joq.
«Ata-analarǵa balalardy sýburqaqtyń sýyna túsýge jibermeýin eskertemiz. Óıtkeni, sýburqaqqa qulaý, jaraqat alý qaýpi bar. Jalpy, qaýipsizdik erejelerin saqtaýdy, sýburqaqqa shomylýǵa tyıym salynǵanyn qaperlerińizge salamyz», -dep málim etti departamenttiń qoǵammen baılanys tobynan.
Eske sala ketelik, budan buryn Atyraýda Jaıyqqa batyp bara jatqan sheteldik azamat qutqarylǵanyn jazǵan bolatynbyz.
Er adam ózenniń arnaıy jabdyqtalmaǵan jerine shomylýǵa túsken. Ol sýdyń orta tusyna júzip baryp, jaǵaǵa jetýi qıyndaǵan. Ony jedel qutqarý jasaǵynyń qutqarýshylary J.Armanov, E.Qalabaev pen S.Muhamedjanov jaǵa alyp shyǵyp, polıtsııa qyzmetkerlerine tapsyrdy.
Qutqarylǵan er adam Ózbekstan Respýblıkasynyń 55 jastaǵy azamaty ekeni anyqtaldy. Ol sýǵa alkogoldik ishimdik iship túsken.
