Atyraýda 10 jasar bala men zeınetker muz astyna túsip ketti

ATYRAÝ. QazAqparat – Atyraýda Jaıyq ózeninen ótpek bolǵan er adam men 10 jasar bala muz astyna túsip ketti. Zeınetkerdi qutqarý múmkin bolmady, dep habarlaıdy QazAqparat tilshisi.

Oblystyq Tótenshe jaǵdaılar departamentiniń qoǵammen baılanys tobynan málim etkendeı, oqıǵa 4 jeltoqsanda bolǵan.

«Departamenttiń dıspetcherlik pýltine keshe, jergilikti ýaqytpen saǵat 20:49-da Atyraý qalasyndaǵy Jumysker aýylynyń tusynda Jaıyq ózeniniń muzy oıylyp, er adamnyń sýǵa batyp ketkeni jóninde shaqyrtý tústi. Oqıǵa ornyna jetken jedel-qutqarý jasaǵynyń 3 súńgýiri saǵat 21:10-da Jaıyq ózenine batyp ketken 72 jastaǵy er adamnyń denesin taýyp, sýdan shyǵardy», - dep habarlady departamentten.

Al 10 jasar balany oqıǵa kýágerleri qutqaryp qalǵan. Dárigerler balany teksergen soń úıine jiberdi.

«Turǵyndarǵa aýa raıynyń qubylýyna baılanysty Jaıyq ózeninde muz áli qalyń emes ekendigin eskertemiz. Qazir ózen jaǵasynda muzdyń qalyńdyǵy nebári 3-4 sm quraıdy. Ózenniń ortasynda muz áli qalyń emes. Muz ústine shyǵý ómirge qaýip tóndiredi», - dep málim etti departamenttiń qoǵammen baılanys tobynan.

Eske sala ketelik, budan buryn Atyraýda 8 jasar bala Jaıyq ózenine batyp bara jatqan jasóspirimderdi qutqarýǵa kómekteskenin habarlaǵan edik.

Eki jasóspirim «Balyqshy-Jumysker» baǵytyndaǵy kópirdiń tusynda Jaıyq ózenine muz ústine shyqqan. Sol kezde juqa muz oıylyp, ekeýi de sýǵa túsip ketken.

Onyń birin 8 jasar bala qolynan tartyp, sýdan shyǵýyna kómektesken. Sýdan shyqqan jasóspirim ekinshisin qutqaryp qalǵan.