Atyraýda 10 myńnan astam oqýshyǵa kómek kórsetildi

ATYRAÝ. QazAqparat ­ - Aktsııa bastalǵan kúnnen búginge deıin 10 116 balaǵa jalpy quny 144 mln teńgeden asa qarajat kóleminde materıaldyq kómek kórsetildi, dep habarlaıdy QazAqparat tilshisi  óńirlik kommýnıkatsııalar qyzmetine silteme jasap.

Memlekettik mekemeler, shaǵyn jáne orta kásip ıeleri, jaýapkershiligi shekteýli seriktester jáne demeýshiler kómegimen balalar oqýǵa eń qajetti  mektep jáne sporttyq kostıýmdermen, krossovkalar, sómkeler jáne keńse taýarlarymen qamtyldy.

Aıta ketý kerek, aktsııa sheńberinde mektepke barmaıtyn balalarǵa, sonymen qatar halyqtyń áleýmettik qorǵalmaǵan toptaryndaǵy balalardy mektepke daıyndaýǵa erekshe kóńil bólindi.

 «Mektepke jol» aktsııasy jalǵasýda, kóp balaly, az qamtylǵan nemese belgili sebeptermen qıyn jaǵdaıǵa tap bolǵan adamdar atalǵan kómekke muqtajdyǵy týraly ótinish jaza alady jáne mindetti túrde qoldaý kórsetiledi»,- deıdi oblystyq bilim basqarmasy. 

Aıta keteıik, iri kólemdegi «Mektepke jol» aktsııasy aǵymdaǵy jyldyń 1 tamyzynan 30 qyrkúıegine deıin jalǵasady.