Atyraýda 10 qabatty turǵyn úıdiń shatyry janyp jatyr
ATYRAÝ. QazAqparat – Atyraýda 10 qabatty turǵyn úıdiń shatyry janyp jatyr, dep habarlaıdy QazAqparat tilshisi.
Oblystyq tótenshe jaǵdaılar departamentiniń qoǵammen baılanys tobynan málim etkendeı, órt, búgin jergilikti ýaqytpen saǵat 19:22-de tutanǵan.
«Órt 10 qabatty turǵyn úıdiń shatyrynda tutanyp, 700 sharshy metr aýmaqty sharpydy. Oblystyq tótenshe jaǵdaılar týraly departamentiniń kúshtik quraldary jalyndy sóndirip jatyr», -dep habarlady departamenttiń qoǵammen baılanys tobynan.
Belgili bolǵandaı, bul – sońǵy jyldary paıdalanýǵa berilgen «Lagýna» turǵyn kesheni.
Jańa turǵyn úı Atyraý qalasyndaǵy Mahambet Ótemisuly kóshesinde №123 mekenjaıynda ornalasqan.
Eske sala ketelik, buǵan deıin Atyraýlyq qutqarýshylarǵa 7 órt sóndirý deposy men 214 tehnıka qajet ekenin jazǵan edik.
Parlament Májilisiniń depýtaty Ádil Jubanovtyń aıtýynsha, Atyraý oblysyndaǵy aýdandarda órt sóndirý depolary apattyq jaǵdaıda tur.
«Birinshi kezekte Atyraý oblysyna 7 órt sóndirý deposyn salý kerek. Onyń 3-eýi kóleminiń eki esege ulǵaıýyna baılanysty Atyraý qalasyna, 1-eýi shahar mańyndaǵy Atyraý aýyldyq okrýgine qajet. Jylyoı aýdanynyń ortalyǵy – Qulsary qalasynda 1, Qurmanǵazy aýdanyndaǵy Aqkól aýylynda 1, Maqat aýdanyna qarasty Dossor kentinde 1 órt sóndirý deposy ashylǵany jón», -deıdi Ádil Jubanov.
