Atyraýda 10 brıgada elektr jaryǵyn qalpyna keltirýge kúsh salyp jatyr
ATYRAÝ. QazAqparat – Atyraý qalasyna irgeles eldi mekenderde jaryq sóndi, dep habarlaıdy QazAqparat.
4 qańtarda Atyraý qalasynda tolassyz qar jaýdy. Bul qala men oǵan irgeles ornalasqan eldi mekenderde jaryqtyń sónýine sebep bolǵan.
«Tolassyz jaýǵan qar qaladaǵy jáne oǵan irgeles ornalasqan eldi mekenderdiń elektr júıesine óz áserin tıgizdi. Máselen, 10/6/0,4kV kerneýdegi áýe jəne kabeldi elektr jelileriniń óshýi magıstraldy 10/6kV áýe elektr jelileri arqyly elektr energııasymen qamtamasyz etiletin tutynýshylardyń teńgerimindegi tehnıkalyq kútimsiz turǵan 10/6/0,4kV kerneýdegi keshendi transformatorlyq stansalary men 10/6kV kerneýdegi áýe elektr jelilerinde aqaýlar tabyldy. Naqtyraq aıtar bolsaq, tutynýshylardyń teńgerimindegi keshendi transformatorlyq stansalardyń 10/6kV kerneýdegi qurylymdaryna erigen qardyń sýynan, polımerli tirek oqshaýlaǵyshtarynda tuıyqtalý oryn aldy. Bul jaryqtyń apattyq jaǵdaıda sónýine ákelip soqtyrdy», - dep habarlady Atyraý qalalyq ákimdiginiń baspasóz qyzmeti.
Osyǵan baılanysty turǵyndardyń ótinishterin eskerip, elektr jelilerindegi apatty qalypqa keltirýge «Atyraý Jaryq» AQ qyzmetkerlerinen quralǵan 10 brıgada men arnaıy tehnıka jumyldyrylǵan.
«Qazir Talǵaıran, Besikti, Birlik-2, Tomarly, Erkinqala, Rakýsha eldi mekenderi men «Órken», «Atyraý» shaǵyn aýdandaryndaǵy kóshelerde elektr júıeleri qalypqa keltirilip jatyr», - dep málim etti ákimdiktiń baspasóz qyzmetinen.
Eske sala ketelik, buǵan deıin Atyraý munaı óńdeý zaýytynda birneshe qondyrǵynyń jumysy 9 kúnge toqtaıtynyn habarlaǵan edik.
