Atyraýda 1 mlrd teńgege kabınet satyp almaq bolǵan mektep jaǵdaıdy túsindirdi

ATYRAÝ. QazAqparat - Atyraý oblysynyń bilim basqarmasy Maqat aýdany B.Qanatbaev atyndaǵy orta mekteptiń nelikten 1 mlrd teńgege kabınet satyp almaq bolǵanyn túsindirdi, dep habarlaıdy QazAqparat.

Vedomstvonyń málimetine qaraǵanda 2021-2022 oqý jylynyń sáýir aıynda Maqat aýdany Dossor kentindegi B. Qanatbaev atyndaǵy orta mektep «Biryńǵaı satyp alý terezesi»veb-portaly arqyly qyzdarǵa arnalǵan materıaldyq-tehnıkalyq jabdyqtalǵan tehnologııa kabınetin satyp alýdy josparlaǵan.

Maqat aýdandyq bilim bóliminiń basshysy Aıbol Doldashevtyń aıtýynsha, qaıta jańǵyrtý (modernızatsııa) negizinde tehnologııa kabınetine 12 000 000 teńge qarajat bólingen.

Osy kabınetti satyp alýdy josparlap, portalǵa qarjysy júktelgen ýaqytta maman tarapynan qate ketip, portalǵa jarııalanyp ketken.

«Keıinnen tehnıkalyq qatelikti baıqaǵan mektep ekonomısi T.Imanbaeva dereý túzetý engizip, qaıta jarııalaǵan. Mamannyń satyp alý portalyna jarııalaǵan kúni 6 sáýirden 14 sáýir aralyǵynda talqylaý ýaqytynda turǵan. Keıinnen 15 sáýir kúni tehnıkalyq qatelikti baıqaǵan T.Imanbaeva túzetip, 20 sáýir kúni qaıta jarııalady», - deıdi aýdandyq bilim bóliminiń basshysy.

Aıta ketelik, qazirgi tańda qatelik negizinde ekonomıst T.Imanbaevaǵa túsinik jumystary júrgizilip, eskertý berildi.

Eske sala keteıik, biz keshe Atyraý oblysynda orta mekteptiń 7 mln teńge turatyn kabınetke 1 mlrd teńge jumsamaq bolǵanyn jazǵan edik.