Atyraýda 1 maýsymda karantın alynady

ATYRAÝ. QazAqparat –Atyraýda búgin, 1 maýsymda karantın alynady. Bul týraly oblystyq bas memlekettik sanıtarlyq dárigeri Temirbek Musaǵalıevtyń qaýlysy shyqty, dep habarlaıdy QazAqparat.

Oblystyń bas memlekettik sanıtarlyq dárigeri sońǵy 7 kúnde Atyraý oblysy halqynyń arasynda koronavırýs ınfektsııasynyń 7 paıyzdan tómen tirkelýin negizge alǵan.

Atalǵan qaýlyǵa sáıkes Atyraý oblysy aýmaǵynda jáne Atyraý qalasynda shekteý sharalary saqtalatyn bolady. Sondaı-aq Maqat aýdanynyń Maqat kentinde, Jylyoı aýdany jáne Teńiz kenishinde, Teńizshevroıl kompanııasynyń vahtalyq kentterinde jáne merdiger kompanııalarda epıdemıologııalyq jaǵdaı tolyq turaqtanǵanǵa deıin sozylady.

1 maýsymda saǵat 00.00-den bastap Atyraý qalasynda aýdanaralyq blokpostar alynyp tastalady. Al azamattarǵa turǵylyqty jerinen shyǵýǵa jáne qozǵalýǵa ruqsat beriledi. Olar áleýmettik ara qashyqtyqty 1,5-2 metrge deıin saqtap, mindetti túrde maska taǵýy kerek.

Sondaı-aq barlyq kásiporyn túrlerine shtattyq rejımde jumysyn jalǵastyrýǵa ruqsat berilip otyr.

Degenmen iri kólemdegi dýmandy, sporttyq, ózge de buqaralyq sharalardy ótkizýge, sonymen birge, otbasylyq, eske alý sharalarynyń, sonyń ishinde úıde ótkizilýine ruqsat berilgen joq.

Buǵan qosa túngi kóńil kóterý oryndardyń qyzmetine, kalıan, adam kóp shoǵyrlanatyn ózge de nysandardyń jumysyna salynǵan tyıym kúshin joımaıdy.

Atap óter jaıt, qoǵamdyq tamaqtaný oryndary bir mezgilde 50 orynnan kóp emes, kórshiles ústelderdiń arasynda 2 metr áleýmettik qashyqtyqty saqtaýy tıis.

Dinı nysandardyń jumysy qatań sanıtarlyq-dezınfektsııalyq rejımdi saqtaı otyryp, 1 maýsymda saǵat 7.00-den bastap qaıta iske qosylatyn bolady.