Atyraýda 1 maýsymda balalarǵa tegin táttiler beriletini týraly jalǵan aqparat tarady
Óńirlik kommýnıkatsııalar qyzmetiniń málimetinshe, WhatsApp messendjerinde aqparat shyndyqqa janaspaıtyn jalǵan aýdıojazba taraǵan.
Onda «1 maýsymda «Isataı-Mahambet» alańynda kontsert bolady. Barlyǵy da balalar úshin tegin. Balmuzdaq, popkorn, maqta, kámpıt sııaqty táttiler satatyndarǵa ákimdikten aqsha bólinip, saǵat 9:00-11:00 aralyǵynda tegin taratylaıyn dep jatyr. Sonymen qatar, oıyn quraldary boıynsha da balalar tegin oınatylady. Bir sózben aıtqanda, ertegiler álemi syndy qyzyqty is-shara bolady» delingen aýdıojazbada.
Bul aqparatty oblystyq mádenıet, tilderdi damytý jáne arhıv isi basqarmasy basshysynyń mindetin atqarýshy Mıra Dáýletbaeva joqqa shyǵardy.
«Bizdiń basqarmanyń uıymdastyrýymen Qurmanǵazy atyndaǵy mádenıet saraıynda saǵat 15:00-de «Daryn» er balalar qorynyń kontserti ótedi. Sol kúni osy saǵatta Sh.Sarıev atyndaǵy óner mýzeıinde kórme ótedi dep josparlanyp otyr. Sondaı-aq, saǵat 12:00-de Mahambet atyndaǵy akademııalyq qazaq drama teatrynda «Alladın» ertegisiniń qoıylymy kórsetiledi. Odan keıin teatr aldyndaǵy alańda kontserttik baǵdarlama usynylady. Basqarma tarapynan budan basqa is-sharalar josparlanǵan joq. Sondyqtan, WhatsApp messendjerinde taraǵan aqparat jalǵan», -dep málim etti Mıra Dáýletbaeva.
Atyraý qalalyq ákimdiginiń baspasóz qyzmeti de jalǵan aqparatqa senbeýge shaqyryp otyr.
Eske sala ketelik, buǵan deıin atyraýlyq oqýshy bir aıda polıtsııaǵa 4 márte jalǵan habar bergenin habarlaǵan bolatynbyz.
