Atyraýda 1,1 myńnan astam JOO túlegi jastar tájirıbesine jiberiledi

ATYRAÝ. QazAqparat – Bıyl Atyraý oblysynda «Jastar tájirıbesine» 1 140 túlek jiberiledi, dep habarlaıdy QazAqparat.

Óńirlik kommýnıkatsııalar qyzmetiniń habarlaýynsha, jaqynda Atyraýdaǵy úsh joǵary oqý ornynan 3 000-nan astam túlek dıplom almaq. Olar 11 fakýltette 79 mamandyq boıynsha bilim alǵan. Sondaı-aq, 25 kolledjdi 4 myńnan astam stýdent bitiredi.

Oblystyq jumyspen qamtýdy úılestirý jáne áleýmettik baǵdarlamalar basqarmasy mamandarynyń aıtýynsha, bıyl «Nátıjeli jumyspen qamtýdy jáne jappaı kásipkerlikti damytýdyń» úshinshi baǵyty sheńberinde «Jastar tájirıbesine» 1 140 adamdy jiberý josparlanǵan.

Jyl basynan beri jumyspen qamtý ortalyqtaryna habarlasqan 240 jas «Jastar tájirıbesine» jiberilgen. Al, byltyr 1325 adam atalǵan jobaǵa joldama alǵan. Olardyń 60 paıyzy turaqty jumysqa ornalasqan.

Eske sala ketsek, Atyraýda «Dıplommen –aýylǵa» jobasymen 40-qa jýyq jas maman aýylǵa baryp, jumys isteıdi.