Atyraý jylyna 60 mln tonna munaı óndiretin bolady – oblys basshysy

NUR-SULTAN. QazAqparat – 2025 jyldan bastap Atyraý oblysynda jylyna 60 mln tonna munaı óndiriledi. Bul týraly Atyraý oblysynyń ákimi Mahambet Dosmuhambetov aıtty, dep habarlaıdy QazAqparat tilshisi.

Mahambet Dosmuhambetov Qazaqstan Prezıdentiniń tapsyrmasymen Atyraý oblysyn áleýmettik-ekonomıkalyq damytýdyń 20212025 jyldarǵa arnalǵan keshendi jospary qabyldanǵanyn atap ótti. Atalǵan jospar aıasyna aldaǵy 5 jylda óńirde 9,5 trln teńgege 198 is-shara júzege asyrylady. Qarajattyń 90 paıyzy nemese 8,7 trln teńgesin jeke ınvestıtsııa quraıdy. Al respýblıkalyq bıýdjetten 671 mlrd, jergilikti bıýdjetten 108 mlrd teńge bólinedi.

«Munaı óndirý kólemi 2025 jylǵa qaraı 28 paıyzǵa artyp, 60 mln tonnaǵa jetedi. Oǵan Teńiz ken ornyn bolashaqta keńeıtý jobasy arqyly jylyna munaı kólemin 12 mln tonnaǵa arttyrý, munaı óndirý kólemin jylyna 2 mln tonnaǵa arttyrýy tıis Qashaǵan ken ornyndaǵy keshendi is-sharalar múmkindik berýi tıis», - dedi Mahambet Dosmuhambetov Ortalyq kommýnıkatsııalar qyzmetindegi brıfıng barysynda.

Onyń atap ótýinshe, óńirde munaı-gaz hımııasyn damytý maqsatynda arnaýly ekonomıkalyq aımaq aýmaǵynda jalpy quny 6,1 trln teńgeni quraıtyn 4 jańa joba júzege asyrylady.