Atyraý jurtshylyǵy jazýshy-dramatýrg Rahymjan Otarbaevpen qoshtasty
ATYRAÝ. QazAqparat - Búgin Atyraý jurtshylyǵy belgili jazýshy-dramatýrg Rahymjan Otarbaevty sońǵy saparyna shyǵaryp saldy, dep habarlaıdy «QazAqparat» tilshisi.
Shuraıly shyǵarmalary Qazaqstan ǵana emes, shet elderge de tanymal bolǵan erekshe daryn ıesi, QR eńbek sińirgen qaıratkeri, halyqaralyq Shyńǵys Aıtmatov atyndaǵy akademııasynyń akademıgi, «Parasat» ordeniniń ıegeri, Atyraý qalasy men Qurmanǵazy aýdanynyń qurmetti azamaty R.Otarbaevpen qoshtasý Mahambet atyndaǵy Atyraý oblystyq akademııalyq qazaq drama teatrynda ótti.
Jazýshy-dramatýrgpen qoshtasýǵa Astana men Almatydan, Qazaqstan óńirlerinen delegatsııalar, sondaı-aq shet elderden Rahymjan Otarbaevty qurmet tutyp, jaqyn aralasqan azamattar keldi.
Qaraly jıynda Atyraý oblysynyń ákimi Nurlan Noǵaev jazýshynyń qaıtalanbas tulǵasyna toqtalyp, onyń esimi eshqashan umytylmaıtynyn jetkizdi.
"Rahymjan Otarbaevtyń qazasy týǵan jeri Atyraý óńiri ǵana emes, onyń shyǵarmalaryn oqyp, qoıylymdaryn kórgen barsha Qazaq eliniń qabyrǵasyn qaıystyryp ketti. Shúkirshilik etetini, sońynda izi de, sózi de, kózi de qaldy. Endi onyń atqara almaı ketken isterin aıaqtaý - keıingi urpaqqa paryz", - dedi óńir basshysy.
Qaraly jıynda, sondaı-aq, teatr jáne kıno tarlany, Qazaqstannyń Eńbek Eri Asanáli Áshimov, aqyndar, "Qazaq ádebıeti" gazetiniń bas redaktory, Qazaqstan Jazýshylar odaǵy basqarmasy tóraǵasynyń orynbasary Janarbek Áshimjan, Aqushtap Baqtygereeva jáne basqalar azaly sózin arnady.
"Sonaý ǵasyrlardaǵy ulylar men sal-serilerdiń jalǵasyndaı bolǵan Rahymjan Otarbaev sózi ǵana emes, júris-turysyna deıin eshkimge uqsamaıtyn dara tulǵa edi. Kórkem prozasy óz aldyna, Beıbarys, Mahambet, Qurmanǵazy syndy ulylardyń teatrdaǵy beınesin somdap ketti. Bul bir adamǵa az dúnıe emes. Aıtmatovtyń ózi joǵary baǵalaǵan Rahymjannyń ekinshi, máńgilik ómiri endi bastaldy" - dedi Asanáli Áshimov.
R.Otarbaevtyń qazasyna oraı jetken jedelhattar da oqyldy.
Bir shúkirshilik etetin jaıt, nebári 62 jasqa qaraǵan shaǵynda dúnıeden ozǵan jazýshy-dramatýrgtiń sońynda mol murasy qaldy. Basqasyn aıtpaǵanda, ózi jazyp ketkenindeı, 40 baspa tabaq oryssha kitaby jáne 7 tomdyǵy ázirge jaryq kórgen joq. Endigi maqsat shyǵarmashylyq jolyn óleńnen bastap, qazaq ádebıetiniń qabyrǵaly ókilderiniń birine aınalǵan qalamgerdiń eńbekterin jınastyryp, baspadan shyǵaryp, halyqqa jetkizý bolsa kerek.
Eske sala keteıik, belgili jazýshy-dramatýrg Rahymjan Otarbaevtyń ómirden ozǵany týraly budan buryn jazylǵan bolatyn.
