Atyraý jastary arasynda eń úzdik balyqshylar anyqtaldy
Dúnıejúzilik balyqshylar kúnine oraı Atyraý qalasynyń jastar resýrstyq ortalyǵy men oblystyq «Jas Otan» jastar qanatynyń uıymdastyrýymen ótken baıqaýǵa qalamyzdyń jáne aýdandardan 16-29 jas aralyǵyndaǵy azamattar qatysty.
«Balyq aýlaý jarysy eki kúnge jalǵasty. Birinshi kúni saıys qatysýshylaryna Sý polıtsııasynyń jáne quzyrly organ mamandary kelip, balyq aýlaýdyń qaǵıdalary men qaýipsizdik tehnıkasy týraly túsindirdi. Al ekinshi kúni tańnyń atysymen jas balyqshylar Jaıyq ózeniniń jaǵalaýyna jınalyp, ózderiniń súıikti isi - balyq aýlaýǵa kiristi. Bul kúni aýa raıy da tamasha boldy. Ózen beti tymyq turdy. Bul baıqaý aldaǵy ýaqytta jalǵasyn tabady», - deıdi jastar resýrstyq ortalyǵynyń basshysy Serik Qadyrov.
Saıys barysynda alǵashqy balyqty Dosbol Ádilov esimdi jas balyqshy ustady.
Jarys kezinde jemdi durys tańdap, balyqty epti ustaý sapasyna mán berildi.
Sońynda qazylar alqasy qarmaqqa ilikken balyqtyń salmaǵy men ólshemine baılanysty júldeli oryndardy belgiledi.
Aıta keter bolsaq, birinshi oryndy Jetkinshek Qultemirov aldy. Ol 80 myń teńge kóleminde qarjylaı syılyqpen marapattaldy. Júldeli ekinshi oryndy ıelengen Asylbek Syrymovqa 50 myń teńge, úshinshi oryndy ıemdengen Dosbol Ádilovke 30 myń teńge tabystaldy.
«Mundaı baıqaýdy joǵary deńgeıde uıymdastyrǵanyna qýanyshtymyn. Jastar arasynda balyq aýlaýdan osyndaı sharalar jıi-jıi ótip tursa, nur ústine nur bolar edi. Balyq aýlaý - buqaralyq sport túri. Sondyqtan, muny damytýǵa Atyraýda mol múmkindik bar», - deıdi baıqaýda júldeger atanǵan Jetkinshek Qultemirov. 
