Atyraý jáne Pavlodar oblystary Ulttyq qor qarajatyn bólýde zańnamany buzdy - Sultanov
Bul týraly búgin Úkimettiń selektorlyq rejimdegi otyrysynda QR Qarjy mınıstri Baqyt Sultanov málim etti, dep habarlaıdy QazAqparat.
«Nurly Jol» memlekettik baǵdarlamasyna bólingen bıýdjet qarjysy jyldyq josparǵa 100 paıyzǵa jýyq ıgerildi. Infraqurylymdyq jobalardy iske asyrýǵa, turǵyn úı-kommýnaldyq sharýashylyǵyn jáne turǵyn úı qurylysyn, bilim berý salasyndaǵy ınfraqurylymdy damytýǵa arnalǵan qarajat tolyq kólemde paıdalanyldy», - dedi ol.
Degenmen, mınıstrdiń dereginshe, Halyqaralyq qarjy uıymdarymen birlesken jobalardaǵy Qazaqstan Respýblıkasynyń úlesin qarjylandyrý boıynsha shyǵystar 0,4 mlrd. teńgege atqarylmaǵan. Oǵan bıýdjet qarajatyn únemdeý men jobalardy iske asyrý kezindegi baǵa aıyrmasy negizgi sebep bolǵan.
«Jergilikti deńgeıde de memlekettik baǵdarlama qarajatyn ıgerý qarqyny joǵary - 98,7 paıyz. 3,2 mlrd.teńge, onyń ishinde transfertter boıynsha 2,9 mlrd. teńge, kredıtter boıynsha 0,3 mlrd.teńge atqarylmady, onyń 0,9 mlrd.teńgesi - únemdeý», - dedi Sultanov.
Bul rette ol transfertter boıynsha ıgermeýdiń eń úlken somasy Aqmola, Qostanaı, Soltústik Qazaqstan jáne Qaraǵandy oblystaryna tıesili ekendigin atap ótti.
Aıta keteıik, Qarjy mınıstrligi taratqan málimetterge sáıkes, ıgerilmegen transferttiń 856,7 mln.teńgesi Aqmola oblysynyń Bulandy aýdanynda ındýstrııaldy ınfraqurylym salý boıynsha ótpeı qalǵan konkýrstar men oryndalmaǵan jumystarǵa baılanysty.
354,5 mln.teńgesi Qostanaı qalasynda ındýstrııaldy aımaq qurý boıynsha josparlanǵan is-sharalardyń ýaqytyly ótkizilmeýine, 181,1 mln.teńgesi Soltústik Qazaqstan oblysynda ınjenerlik jeliler salý boıynsha oryndalmaǵan jumystar men olardyń kesteden keshigýine baılanysty, 170,2 mln.teńgesi Qaraǵandy oblysynda ınjenerlik kommýnıkatsııalar salý boıynsha tehnıkalyq-ekonomıkalyq negizdemelerdi, qarjy-ekonomıkalyq negizdemelerdi, jobalaý-smetalyq qujattamany túzetýge jáne josparlanǵan is-sharalardyń ýaqytyly ótkizilmeýine baılanysty oryn alǵan.
«Bul rette, Atyraý jáne Pavlodar oblystarynyń ákimdikteri tyıym salýǵa qaramastan, ınjenerlik-kommýnıkatsııalyq ınfraqurylymdy damytýǵa kózdelgen Ulttyq qordan berilgen qarajatty ınvestıtsııalyq jobalar arasynda qaıta bólýge jol bergen. Bul bıýdjet zańnamasynyń buzýshylyǵy bolyp tabylady jáne qaıta bólingen somany 2017 jylǵy 1 naýryzǵa deıin Ulttyq qorǵa qaıtarý úshin respýblıkalyq bıýdjetke aýdarý qajet. 2017 jylǵy 14 aqpandaǵy jaǵdaıy boıynsha jergilikti atqarýshy organdarmen qarajattar qaıtarylǵan joq», - dedi Sultanov.
