Atyraý jáne Astrahan oblystarynyń shekarasynda qorshaýlar ornatylyp jatyr

«Bıyl 14 sáýirde Qurmanǵazy aýdanynyń Kóptoǵaı aýylynda Qazaqstan men Reseı shekarasynda jańa shekaralyq qorshaý salý jumystary bastaldy», dep habarlaıdy Atyraý oblysynyń Óńirlik kommýnıkatsııalar qyzmeti.

Qazirgi ýaqytta 2005 jylǵy 18 qańtarda Máskeýde qol qoıylǵan «Qazaqstan-Reseı memlekettik shekarasy týraly kelisimi» boıynsha eki el arasynda shekara beldeýi ornatylýda. Al, demarkatsııalyq jumystary áli aıaqtalǵan joq.

Shekara aýmaǵynda jańa qorshaýlardy 2016 áskerı bólimi júrgizýde.

«Bul jumystar qazir emes, buryn bastalýy tıis edi, biraq ártúrli sebeptermen júzege asyrylmaı keldi. Tek bıylǵy jyldyń 14 sáýirinde shekarashylar qurylys jumystaryna kiristi. Shekara qorshaýy jumystary júrgizilmes buryn, 13 sáýirde ákimdik, shekara qyzmeti men quqyq qorǵaý organdarynyń ókilderi Kóptoǵaı aýylynyń turǵyndarymen kezdesip, jumystardyń zańdylyǵy týraly túsindirý jumystaryn júrgizgen bolatyn. Sondaı-aq shekara qyzmeti men quqyq qorǵaý organdary da jasalyp jatqan jumystardyń zańdylyǵyn túsindirdi»,-dedi Qurmanǵazy aýdanynyń ákimi Marat Murzıev.

QR UQK Shekara qyzmetiniń ókilderi túsindirgendeı, 2013 jyldyń mamyr aıynda ornatylǵan №23 jáne №24 shekaralyq belgiler arasyndaǵy metall qorshaýlar RF aýmaǵyna qaraı 10-70 metrge aralyqta ornalasqan.

Qazirgi ýaqytta Reseı Federatsııasynyń aýmaǵynda ornalasqan uzyndyǵy 1800 metr qorshaýlardy turǵyzý úshin ınjenerlik jumystar Kóptoǵaı aýylynda júrgiziledi.