Atyraý jəne Mańǵystaý oblystarynyń əkimdikteri memorandýmǵa qol qoıdy
ATYRAÝ. QazAqparat - Keshe Atyraý oblysynyń əkimi Nurlan Noǵaev pen Mańǵystaý oblysynyń əkimi Eraly Toǵjanov eki oblystyń arasyndaǵy yntymaqtastyq týraly memorandýmǵa qol qoıdy, dep xabarlaıdy QazAqparat tilshisi.
Memorandýmnyń maqsaty - óńiraralyq kooperatsııany damytý jəne óńirlerdiń bəsekege qabilettiligin arttyrý bolyp tabylady.Taraptar ónerkəsip, shaǵyn jəne orta bıznes salasynda, aýyl sharýashylyǵy, densaýlyq saqtaý, ekologııa, qurylys salalarynda yntymaqtastyq jasaýǵa kelisti. Sondaı-aq oblystar arasynda jastar saıasaty, mədenıet jəne sport salalarynda da ózara is-qımyl jasaý kózdelýde.
Atyraý oblysynyń əkimi Nurlan Noǵaev atap ótkendeı əkimdikterdiń aldynda turǵan basty mindet- óńirlerdi ekonomıkalyq damytýdyń túrli salalaryndaǵy tabysty jumys təjirıbesimen tanysý.
"Memleket basshysy Nursultan Nazarbaevtyń mańyzdy tapsyrmalarynyń biri óńiraralyq qarym-qatynasty damytý bolyp tabylady.Tabysty təjirıbe almasý óte paıdaly, bul kóp jaǵdaıda damý protsesterin jedeldetedi. Biz búgin məselelerdiń keń aýqymyn talqyladyq, ekijaqty yntymaqtastyq aıasynda kóptegen jobalar boıynsha pikir almastyq.Biz qyzyǵýshylyqtyń, məseleni uǵynýdyń bar ekenin kórip otyrmyz. Jaqyn arada barlyq talqylanǵan jobalardy iske asyrý josparlanýda», - dedi Nurlan Noǵaev.
Mańǵystaý oblysynyń əkimi Eraly Toǵjanovtyń pikirinshe, ekonomıkany ərtaraptandyrý maqsatynda shıkizattyq emes sektorlardy damytý məselelerine nazar aýdarý qajet.
"Bul óńdeý ónerkəsibi, shaǵyn jəne orta bıznesti damytý, aýyl sharýashylyǵyndaǵy jobalardy iske asyrý, azyq-túlik qaýipsizdigi. Qurylys jəne týrızmdi damytý salasynda tartymdy jobalar bar. Barlyq qol jetken kelisimderdi iske asyrý óńirler men respýblıkanyń ekonomıkalyq ósýi úshin serpin bermek", - dep basa aıtty Eraly Toǵjanov.
Búgingi kúni Mańǵystaý oblysy elimizdiń iri kólik logıstıkalyq habtarynyń biri. Teńiz porttaryn damytý Qazaqstannyń ekonomıkasy úshin úlken serpin beredi. Mańǵystaý oblysynyń basshysy iri munaı jobalaryndaǵy qazaqstandyq qamtý məselesin qozǵady.
"Oblystyń aýmaǵynda úsh munaı kompanııasy jylyna orta eseppen 1 trln 400 mlrd teńgege taýarlar satyp alady. Onyń ishinde 30%-y respýblıkadan tys jerlerden, bul shamamen 500 mlrd teńge. Bul bizdiń kəsiporyndar úshin, ınvestıtsııalar tartý úshin úlken naryq jəne əleýet. Osy taýarlardy respýblıka aýmaǵynda óndire otyryp, biz jergilikti kompanııalardy damytýǵa, jańa jumys oryndaryn ashýǵa, memleket bıýdjetin tolyqtyrýǵa jaǵdaılar jasaımyz", - dedi Eraly Toǵjanov.
Óz kezeginde Atyraý oblysynyń əkimi Nurlan Noǵaev oblys aýmaǵynda arnaıy ındýstrııalyq aımaqty damytý boıynsha bolashaq josparlar týraly əńgimeledi.
«Ózderińiz bilesizder, Parlamentte arnaıy ekonomıkalyq jəne ındýstrııalyq aımaqtar týraly zań jobasy talqylanýda. Eger bul zań qabyldanatyn bolsa biz osy baǵytta damytýǵa daıynbyz. Isataı aýdanynda arnaıy ındýstrııalyq aımaq qurý úshin jer ýchaskesi bólindi. Osy baǵytta təjirıbe almasý úshin biz Túrkııada boldyq. Olarda ındýstrııalyq aımaqtyń aýmaǵynda 35 myń adam, shamamen 180 rezıdent jumys jasaıdy. Olardyń bir bóligi, 35-40 kəsiporyn bizdiń naryqqa kelýge daıyn.Bul úshin zańnamalyq baza, salyq turaqtylyǵy qajet. Sonymen birge bizde munaıhımııalyq klasterdi damytý úshin arnaıy ekonomıkalyq aımaq jumys jasaıdy. Mundaı jobalardy iske asyrý daıyn ónim shyǵarýǵa múmkindik beredi, bul bəsekege qabiletti kəsiporyndar qurýǵa septigin tıgizedi», - dep túsinik berdi Nurlan Noǵaev.
Aıta ketelik, memorandýmǵa qol qoıý eki oblystyń ekonomıkalyq jəne ınvestıtsııalyq əleýetin damytýǵa jańa serpin beredi.
