Atyraý yqshamaýdanyndaǵy kópqabatty úıler ystyq sýdy 80 jyl kórmegen
ATYRAÝ. QazAqparat - Atyraý oblysynyń ákimi Nurlan Noǵaev turǵyn úılerdi jylý júıesine qosý boıynsha júrgizilip jatqan jumystarmen tanysý úshin Balyqshy yqshamaýdanyndaǵy jańa jylý energetıkalyq kesheninde boldy, dep habarlaıdy QazAqparat tilshisi.
Atyraý qalalyq qurylys bóliminiń aqparaty boıynsha, ortalyq jylý júıesine barlyǵy 53 úı qosylady, onda 2500 páter bar. Balyqshy yqshamaýdanyndaǵy kvartalishilik jylýmen jabdyqtaý jelilerin qaıta jóndeý sheńberinde 8 shaqyrym jerústi magıstraldyq qubyry tartyldy. Jylý jelileri trassasynyń jalpy uzyndyǵy 22 shaqyrymdy quraıdy.
«Qazirgi tańda yqshamaýdannyń 36 turǵyn úıine jylý berildi. Barlyq 53 úıdi tolyq qosýdy 20 qazanǵa deıin aıaqtaý josparlanýda», - dedi Atyraý qalasy ákiminiń orynbasary Nurlan Taýbaev.
Jobalyq-smetalyq qujattamaǵa sáıkes Balyqshydaǵy úıler JEO-ǵa táýeldi shema boıynsha jylýmen jáne yqshamaýdannyń tarıhynda alǵash ret ystyq sýmen qamtamasyz etiletin bolady. Joba 90% jergilikti bıýdjetten jáne 10% respýblıkalyq bıýdjetten qarjylandyryldy. 
«Búgingi tańda joba aıaqtaldy, ol úsh bólikten turdy, birinshi bólim - magıstraldyq jylý jelileri, ekinshi bólim - ortalyq jylý pýnkti jáne sońǵy tarmaq. Búgingi kúni ortalyq jylý pýnktiniń qýaty ystyq sýǵa - 15 megavatty, jylýǵa 15 megavatty, jalpy 30 megavatty quraıdy. Úsh jobanyń jalpy quny - 3, 3 mlrd teńge», - dedi qalalyq qurylys bóliminiń basshysy Tımýr Basarov.
Balyqshy kentiniń tarıhy 1937 jyldan bastap Atyraý balyq konservileý kombınatynyń qurylýynan bastaý alady. Osy ýaqytqa deıin kent turǵyndary úıde ystyq sýmen qamtamasyz etýdiń jáne jylý berýdiń nasharlyǵynan úlken qolaısyzdyqtar kórip kelgen bolatyn.
«Bul úılerde ystyq sýmen qamtamasyz etýge arnalǵan sý qubyry bolǵan joq. Al kópqabatty úıler gaz qazandarymen jylytyldy. Olardyń qýaty barlyq úılerdi jylytý úshin jetpedi. Ótken jyldyń kúzinen bastap Atyraý qalasynyń ákimdigi Balyqshy yqshamaýdanynda jańa jylý energetıkalyq keshen salý jobasyn júzege asyrýǵa kiristi. Qazirgi ýaqytta úılerdi ortalyq jylý júıesine qosý aıaqtalýda. Endi osynyń arqasynda Balyqshy turǵyndarynyń úılerine jylý jáne ystyq sý keledi», - dedi Atyraý qalasynyń ákimi Alımuhammed Quttumuratuly.
Atyraý oblysynyń ákimi qaramaǵyndaǵylarǵa Balyqshy yqshamaýdanyndaǵy úılerdi ortalyq jylý júıesine qosý boıynsha barlyq jumystardy aıaqtaýdy, aqaýlyqtar men apatty jaǵdaılardy boldyrmaý úshin Balyqshy yqshamaýdanyndaǵy úılerdi aralap shyǵýdy tapsyrdy.
