«Atyraý» voleıbol komandasy el kýboginiń ıegeri atandy
Atyraýda 8-13 qazanda Qazaqstannyń eńbek sińirgen jattyqtyrýshysy Mamash Omarovty eske alýǵa arnalǵan erler arasyndaǵy voleıboldan el kýbogin 8 komanda sarapqa saldy.
«Jaıyq» sport kesheninde ótken dúbirli dodada «Altaı» (Shyǵys Qazaqstan), «Býrevestnık» (Almaty), «Esil» sport klýby (Petropavl), «Taraz» (Taraz), «Pavlodar» (Pavlodar), «Jetisý-Jastar» (Jetisý), «Jaıyq» (BQO) pen jergilikti «Atyraý»(Atyraý) komandalarynyń oıyn órnegi jankúıerler yqylasyna bólendi.
Tartysty ótken oıyndardyń aqtyq básekesinde «Býrevestnık» pen «Atyraý» komandalary kezdesti. Nátıjesinde qarsylasyn 3:2 esebimen utqan «Atyraý» komandasy el kýbogin utyp aldy. Al, «Pavlodar» komandasy úshinshi júldeni ıelendi. Jeńimpaz ben júldeger komandalardy oblys ákimi Serik Shápkenov quttyqtady.
«Elimizde buqaralyq sportty damytýǵa erekshe kóńil bólinip otyr. Ásirese, «Atyraý» voleıbol komandasynyń jetistigi barshamyzǵa qýanysh syılady. Bul komanda jyl saıyn talaı júldeni ıelenip júr. Jergilikti voleıbol komandasynyń jeńisi jastardyń jigerin, voleıbol sportyna qulshynysty arttyrdy dep oılaımyn. Jas býyn salaýatty ómir saltyn ustanyp, jat ádetterden boıyn aýlaq ustaýy qajet. Barshamyzdyń mindetimiz –balalar men jasóspirimderdi buqaralyq sportqa tartyp, deni saý ult qalyptastyrý», - dedi Serik Shápkenov.
«Atyraý» voleıbol komandasy buǵan deıin el kýboginiń 6 dúrkin jeńimpazy atanǵan. Eske sala ketelik, budan buryn Atyraýda qazaq kúresinen el chempıonaty aıaqtalǵanyn habarlaǵan bolatynbyz.
