«Atyraý» voleıbol klýby sýperkýbok ıegeri atandy
ALMATY. QazAqparat – «Atyraý» voleıbol klýby sýperkýbok ıegeri atandy, dep habarlaıdy QazAqparat tilshisi.
Sýperkýbok úshin match Almaty qalasyndaǵy «Dostyq» sport kesheninde erlerdiń Ulttyq lıga komandalary arasynda HHHІ el chempıonatynyń birinshi týry aıasynda ótti.
Bıyl el chempıony atanyp, kýbokty qosa utyp alǵan atyraýlyqtar men Almatynyń «Býrevestnık» komandasy alańǵa shyqty.
Rafaıl Gılıazýtdınov jattyqtyratyn almatylyqtar buǵan deıin úsh jyl qatarynan sýperkýbokty utyp alǵan bolatyn. Bıyl el kýbogy úshin fınalda olar atyraýlyqtarǵa jol bergen edi.
Bul joly da match óte tartysty ótti. Birinshi partııada almatylyqtar 25:22 esebimen basym tústi. Áıtse de sodan keıin Vıktor Kozıktiń shákirtteri oıyn tizginin óz qolyna aldy – 28:26, 25:16, 25:23.
Osylaısha, 3:1 esebimen jeńiske jetken atyraýlyqtar bıylǵy sýperkýbok ıegeri atandy.
Eske sala keteıik, budan buryn Almatyda erler arasynda el chempıonaty bastalǵanyn jazǵan bolatynbyz.
