Atyraý ýnıversıtetteri Túrkııada oqıtyn qazaqstandyq stýdentterdi qabyldaýǵa daıyn
Munaıly óńirde eki joǵary oqý orny bar. Onyń biri – H.Dosmuhamedov atyndaǵy ýnıversıtet, ekinshisi – S.Ótebaev atyndaǵy munaı jáne gaz ýnıversıteti.
Eki ýnıversıtettiń basshylyǵy Túrkııadaǵy tótenshe jaǵdaıǵa baılanysty sol elde oqyp júrgen Qazaqstan stýdentterine bilimin jalǵastyrýǵa múmkindik bergeli otyr.
Máselen, S.Ótebaev atyndaǵy munaı jáne gaz ýnıversıtetiniń rektory Gúlzada Shakýlıkovanyń aıtýyna qaraǵanda, shetelde oqıtyn qazaqstandyq stýdentter joǵary jáne joǵary oqý ornynan keıingi bilim berýdiń barlyq baǵdarlamasymen bilimin jalǵastyra alady.
Al H.Dosmuhamedov atyndaǵy Atyraý ýnıversıtetinde jaqyn arada Túrkııaǵa oqýǵa ketýge daıyndalyp júrgen stýdentter bar.
«Bizdiń magıstrant jer silkinisi oshaǵynan alys ornalasqan Chanakkala qalasynda oqıdy. Sondyqtan ol sol elde oqýyn jalǵastyra berýdi qalap otyr.
Al eki stýdent Erzýrým jáne Nııde qalalaryna oqýǵa barýy kerek edi. Túrkııadaǵy tótenshe jaǵdaıǵa baılanysty bul stýdentterdiń ata-analary qandaı sheshim qabyldaıtyny ázirge belgisiz», - deıdi atalǵan ýnıversıtettiń halyqaralyq qatynastar jáne ınternatsıonalızatsııalaý bóliminiń basshysy Qarlyǵash Áshirhanova.
Eske sala ketelik, Túrkııada joıqyn jer silkinisinen qaza bolǵandardar sany 17 myńnan asty, 72 myńǵa jýyq adam zardap shekti. Mektepterde sabaq 20 aqpanǵa deıin toqtatyldy.
Qazaqstan qutqarýshylary mingen bort 7 aqpan kúni túrik eline attanǵan bolatyn. Mamandarymyzdyń ekinshi toby 8 aqpan keshqurym jetti. Alǵashynda qazaqstandyq bortpen 16 adam, ekinshi bortpen 64 adam Túrkııadan elimizge jetkizilgen edi.
7 aqpanda QR Syrtqy ister mınıstrliginiń resmı ókili Aıbek Smadııarov Túrkııadaǵy 19 qazaqstandyq stýdent elge qaıtatynyn málim etken edi.
