Atyraý turǵynynan psıhotropty dáriler, 3 mln teńge men jeke kýálikter tárkilendi
Oblystyq polıtsııa departamenti baspasóz qyzmetiniń aqparatyna qaraǵanda, 26 aqpanda kezekshi bólimine áıeldiń zańsyz esirtki daıyndaý, psıhotropty dárilerdi saqtaǵany týraly habar túsken.
Atalǵan derekke baılanysty Atyraý qalalyq polıtsııa basqarmasy №2 polıtsııa bóliminiń qyzmetkerleri «Bereke» shaǵynaýdanynda ornalasqan kópqabatty turǵyn úı páterleriniń birine tekserý júrgizgen.
«Tekserý kezinde dúıkege tıetin áseri joǵary 7 dana tramadol, 3 dana tropıkamıd dári-dármeginiń bos bótelkesin, dárigerdiń ruqsatymen ǵana beriletin «Somnolıı» dári-dármegi jáne tsellofanǵa oralǵan qara tústi ózine tán ıisi bar psıhotroptyq esirtkige uqsas zat tabyldy. Buǵan qosa bóten adamdardyń 14 jeke basyn kýálandyratyn túrli qujattary, 6 dana eńbek kitapshasy men 3 mln 074 myń teńge tabylyp, tárkilendi», -dep habarlady departamenttiń baspasóz qyzmeti.
Qazir kúdiktige qatysty QR Qylmystyq kodeksiniń 296-babynyń 2-bóligimen sotqa deıingi tergep-tekserý amaldary júrgizilip jatyr.
Ózge aqparat QR Qylmystyq-protsestik kodekstiń 201-babyna sáıkes jarııalaýǵa jatpaıdy.
Eske sala ketelik, buǵan deıin Atyraýda 9 kelige jýyq marıhýana saqtaǵan kúdikti ustalǵanyn habarlaǵan edik.
Esirtki zattaryn 1973 jylǵy kúdikti zańsyz saqtap kelgen. Sot-saraptamalyq taldaýdyń qorytyndysyna sáıkes salmaǵy 206 polıetılen qapqa salynǵan 8 keli 867 gramdy quraıtyn zattar keptirilgen marıhýana ósimdigi ekeni rastalǵan. Kúdikti qamaýǵa alyndy
