Atyraý turǵynynan 5 keliden astam esirtki tárkilendi

ATYRAÝ. QazAqparat –Atyraý qalasynyń mańyndaǵy Zaroslyı eldi mekeniniń turǵynynan 5 keliden astam esirtki tárkilendi, dep habarlaıdy QazAqparat.

Oblystyq polıtsııa departamenti esirtki qylmysyna qarsy is-qımyl basqarmasynyń qyzmetkerleri «Qarasora» jedel profılaktıkalyq is-sharasy kezinde 28 jastaǵy turǵyndy ustady.

«Ustalǵan turǵynnyń úıinen eki polıetıelen qapqa salynǵan esirtki zattary tárkilendi. Saraptama qorytyndysymen tárkilengen esirtkiniń jalpy salmaǵy 5 keli 30 gramdy qurady. Kúdiktige qatysty QR Qylmystyq Kodeksiniń 296-babymen (Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý) sotqa deıingi tergeý júrgizilýde» -dep habarlady departamenttiń baspasóz qyzmeti.

Atyraý polıtseıleri 1 maýsymda bastalǵan «Qarasora» jedel is-sharasy kezinde zańsyz aınalymnan 20 keliden astam esirtki zattaryn tárkiledi.

Eske sala ketelik, buǵan deıin Atyraýda qarýdy zańsyz saqtap, qarasora ósirgen turǵyn qamalǵan bolatyn.