Atyraý turǵyny Jaıyq ózeniniń túbinde «senbilik» ótkizdi
Jaıyq ózeniniń túbinen qoqys jınaǵan Aslan Omarov áleýmettik jelidegi paraqshasynda áserimen bólisti.
«Jaıyq ózeniniń túbin tazalaý bastaldy. Eki saǵatta 50 metrdeı sý astyn tazalap kórdik. Nátıje adam shoshyrlyqtaı. Sý astynan tas baılanǵan kapron tor, salmaǵy aýyr tastar, shirip ketken temirler, tsellofan, plastık qutylar shyqty. Aq Jaıyǵymyzdyń túbi qoqysqa tolyp qalypty. Biz tazalaǵan qoqystar biraz jyldan beri jatyp qalǵan. Osynsha qoqysty kórip, jaǵamdy ustadym. Tabıǵatty lastap jatqanymyzǵa shoshydym. Bul – meniń qoqysym emes. Biraq, bul ózen – bizdiń Aq Jaıyǵymyz», - dep jazdy ol.
Onyń aıtýynsha, qoqysty kóterip shyǵarý qıynǵa soqqan. Aýyr tastar belge kúsh túsirgen.
«Maǵan Jaıyq-Kaspıı oblysaralyq basseındik balyq sharýashylyǵy ınspektsııasynan kómek kerek. Inspektsııa qaıyqpen kómekteser bolsa, áýesqoı balyq aýlaýshylardan top uıymdastyrar edim. Jaıyq ózeniniń túbin júıeli túrde tazartqym keledi», - deıdi Aslan Omarov.
Eske sala ketelik, budan buryn Jaıyq ózeniniń Kaspıı teńizine quıar saǵasynyń tereńdigi jarty metrge jetpeıtinin habarlaǵan bolatynbyz. Jergilikti atqarýshy organ, tabıǵatty qorǵaý qurylymdary ókilderi men óńirlik qoǵamdyq keńes múshelerinen quralǵan jumys toby Jaıyq ózeniniń Kaspıı teńizine quıar saǵasyna zertteý júrgizdi. Ózen saǵasynyń tereńdigi - 30-40 sm, ıaǵnı jarty metrden az bolǵan. Al, saǵadan shamamen 10 shaqyrym qashyqtyqta zerttelgen ýchaskelerdegi tereńdik eki metrden asqan.
