Atyraý turǵyny stomatologııalyq klınıkadan sot arqyly 500 myń teńge óndirip aldy
ASTANA. QazAqparat - Atyraý oblysynyń turǵyny stomatologııalyq klınıkaǵa sot arqyly 500 myń teńge tóletti, dep habarlaıdy QazAqparat Jylyoı aýdandyq sotynyń baspasóz qyzmetine silteme jasap.
«2017 jyldyń maýsymynda K. atty azamatsha aldyńǵy 4 tisine keramıka qoıý úshin stomatologqa kelgen jáne onyń qyzmetine 52 myń teńge tólegen. Birshama ýaqyt ótken soń áıel adamnyń tis salynǵan jerleri aýyra bastaıdy. Osy sebepti ol ózge dárigerlerdiń kómegine júgingen. Olar arqyly áıel ózine sapasyz keramıka qoıylǵandyǵyn bilgen»,-delingen habarlamada.
Sóıtip sotqa ótinish túsirgen turǵyn ózine keltirilgen zııan úshin 541 myń teńge, al moraldyq zııan keltirgeni úshin taǵy 100 myń teńge ótemaqy talap etti.
Medıator sýdıanyń qatysýymen «Sottaǵy tatýlasý protsedýrasy» atty ilki joba aıasynda qaralǵan is boıynsha daýdy medıatsııa tártibinde sheshýge kelisken taraptar, ózara kelisimge keldi.
Kelisim talaptary boıynsha, osy jaǵdaıǵa jaýapty tulǵa shaǵym ıesine 500 myń teńge kóleminde moraldyq jáne materıaldyq shyǵyn tóleıdi. Al shaǵym ıesi sottasýdan bas tartty.
