Atyraý turǵyny qylmysty ashýǵa kómektesti
ATYRAÝ. QazAqparat- Atyraý turǵyny urlyq qylmysyn ashýǵa kómektesti, dep habarlaıdy QazAqparat tilshisi.
Jumystan kelgen Álibek Jaqsyǵalıev kórshisiniń aýlasynda júrgen bóten ekeýdi kóredi. Aýlada júrgenderdiń biri terezege tas laqtyryp, úıde eshkim joq ekenin bilgen soń ekinshisi aýladan sekirip, ishke kiredi.
«Dereý kórshime qońyraý shaldym. Olar qonaqqa ketken eken. «Polıtsııaǵa habarlaıyn ba?» dep suradym da, jalma-jan «102»-ge telefon soqtym. Polıtsııa az ýaqyttyń ishinde kelip jetti. Biri aýlanyń syrtynda qaldy da, ekinshi polıtseı aýlanyń syrt jaǵymen ishke kirdi», -deıdi oqıǵa kýágeri Á.Jaqsyǵalıev.
«Batys-25» ekıpajynyń qyzmetkerleri Rıshat Jamelov pen Samat Meńdiǵalıev oqıǵa ornynan qashqan 2 kúdiktini qýyp jetý úshin biraz júgirdi.
«Bizdi kórgen aýladaǵy 2 adam qoldaryndaǵy altyn buıymdy laqtyrdy da, qasha jóneldi. Áriptesim Samat avtokólikpen izine tústi. Men qara jolmen artynan qýdym. Kómekke «Batys-24» ekıpajy kelip, aýmaqty qorshaý arqyly olardy ustadyq», - dep baıandady oqıǵany patrýl polıtsııasynyń ınspektory Rıshat Jamelov.
Departament bastyǵy Qamza Úmbetqalıev Álibekti jeke qabyldap, qylmystyń aldyn alýǵa qosqan úlesi úshin alǵys aıtty.
«QR ІІM jasaqtaǵan «Kórshi baqylaýy» baǵdarlamasy qylmystyń ashylýyna kóp septigin tıgizip otyr. Polıtsııaǵa der kezinde túsken qońyraý qylmyspen kúrestiń tıimdiligin arttyrady. Qyraǵylyq tanytqanyńyz úshin rahmet», - degen departament bastyǵy Álibek Jaqsyǵalıevke alǵys hat tabys etti.
Sonymen qatar, polıtsııa polkovnıgi Álibekke qoǵamdyq kómekshi bolýǵa usynys jasady.
Aıta ketelik, jyl basynan beri oblysta konserjderdiń kómegimen 8 qylmys ashylyp, 200-den astam quqyqbuzýshylyq anyqtalǵan.
