Atyraý turǵyny qoqysty jer astynda saqtaý jobasyn usyndy
«Qala turǵyndary usynǵan jobalardyń ishinde kólik joldaryn ózgertýden bastap, qala ekologııasyn jaqsartýǵa deıingi jobalardy atap ótýge bolady. Mysaly, Atyraý qalasynda turǵyndardyń biri qoqysty jer astyna jınaý jáne ýaqytsha saqtaý sheshimin usyndy. Jerasty jınaý júıesi aýmaqtyń estetıkalyq kórinisin qamtamasyz etýge, shashyrańqy qoqystardan arylýǵa múmkindik beredi. Jerasty platformasynyń konstrýktsııasy standartty kólemnen anaǵurlym kóbirek – 7 tonnaǵa deıin qoqys saqtaýǵa múmkindik beredi. Sondaı-aq, bıogaz óndirý jáne aralas óndiristerdi damytý arqyly kárizdik sarqyn sýdy qaıta óńdeý boıynsha da joba usynyldy. Biz ýrbanıstıkadaǵy tásilder ártúrli ekenin taǵy da atap ótemiz, munda tek kólik, sáýlet, ekologııa máseleleri ǵana emes, áleýmettaný máseleleri de qaralady», - dedi Q88 ýrbanıster qaýymdastyǵy keńesiniń tóraǵasy Erlan Áýkenov ortalyq kommýnıkatsııalar qyzmetinde ótken baspasóz máslıhatynda.
Sonymen birge, pılottyq qala retinde tańdalǵan Atyraý men Aqtaý qalalarynyń turǵyndaryn sý burý, turǵyn úı-kommýnıkatsııalyq sharýashylyq, jańǵyrtý jumystary, qala kóshelerin jańǵyrtý máseleleri de tolǵandyrady.
Sport alańdaryn, kreatıvti klasterler qurý, BJSM, olımpıada rezervin salý bastamalary da kóterilgen.
4 mamyrǵa deıin barlyq jobalyq sheshimderge daýys jınalady, sodan keıin qalalyq ákimshilikterge júzege asyrýǵa jiberiledi.
«Aqtaý jáne Atyraý qalalarynyń turǵyndary daýys berýge belsendi qatysyp jatyr. Sońǵy aıda eki qaladan 11 myń paıdalanýshy tirkeldi. Jobalyq usynysty talqylaý barysynda kásibı sarapshylardan - 151 pikir, Aqtaý boıynsha – 89, Atyraý boıynsha – 62 usynys kelip tústi», - dedi Erlan Áýkenov.
Aıta keteıik, jyl basynda qalalardy sapaly josparlaý Berekeli bastama platformasynda talqylanatyny jarııalanǵan edi.
Portalda qalanyń ár turǵyny ınfraqurylymdy jaqsartý boıynsha óz usynystaryn bere alady.
Jobalardy mamandar ǵylymı turǵyda qarastyryp, eń úzdikteri daýys berý úshin portalda jarııalanady.
