Atyraý turǵyny qoqys jáshiginen taýyp alǵan náresteni asyrap alǵysy keledi
Náresteni taýyp alǵan Shattyq Nuradınov 6 qarasha kúni shamamen 23:00-de keshki astan keıin shylym tartýǵa shyqqan. Oǵan birneshe bala júgirip kelip, qoqys konteıneri janynan birtúrli dybystardyń estilgenin aıtqan.
«Qoqys jaqqa barǵanymda mysyqtyń emes, kádimgi jylap jatqan balanyń daýysyn estidim. Telefonymnyń jaryǵyn túsirip, qoqysqa arnalǵan qaltadan sábıdi shyǵaryp aldym. Onyń ústi-basy qan-qan jáne kindigi de kesilmegen edi. Dereý kúrteme orap, áıelime ákeldim. Áıelim balany baýyryna basyp, jylytty», - deıdi Nursaıa shaǵyn aýdanyndaǵy 64-úıdiń turǵyny.
Osydan keıin er adam polıtsııa men jedel járdem qyzmetterin shaqyrǵan. Dárigerler sábıdiń jaı-kúıin tekserip, kindigin kesip, aýrýhanaǵa alyp ketken.
Shattyq Nuradınovtyń otbasy Nursaıa shaǵynaýdanyna 2013 jyly Maqat aýdanynan kóship kelgen. Ózi 1993 jyldan beri munaı kompanııasynda operator bolyp eńbek etedi.
Sondaı-aq, Sh.Nuradınov - bes uldyń ákesi. Onyń tuńǵyshy kolledjde jáne ekinshi uly - Almatydaǵy sporttyq mektepte bilim alady. Taǵy eki uly Nursaıa shaǵyn aýdanyndaǵy 37 mektepte oqıdy. Eń kenjesi áli bir jasqa tolmaǵan.
Osy oraıda, bes uldyń ákesi jýrnalısterge ózi taýyp alǵan qyz balany asyrap alǵysy keletinin jetkizdi.
«Búgin áıelim ekeýmiz aýrýhana baryp, shaqalaqty qolymyzǵa alyp, ıiskelep, qyzyqtap qaıttyq. Jaıalyqtar men sút aparyp berdik. Endi úkimet pen halyq kómektesse, sábıdi bes ulymyzǵa qaryndas etip, asyrap alǵymyz keledi», - dep aǵynan jaryldy ol.
Eske sala ketsek, keshe Atyraý qalasynda qoqys jáshiginiń janynan jańa týǵan náreste tabyldy jáne perınataldyq ortalyqqa jetkizildi. Atyraý oblystyq ІІD baspasóz qyzmetiniń habarlaýynsha, jańa týǵan qyz bala 6 qarasha kúni týǵan bolýy múmkin, onyń salmaǵy 3 keli 56 gramm. Atalǵan isti tergeýmen kámelettik jasqa tolmaǵandar isi jónindegi ınspektsııa men krımınaldy polıtsııa qyzmetkerleri aınalysyp jatyr.
Ázirge kókek ananyń aty-jóni anyqtalǵan joq.
Atyraý oblystyq densaýlyq saqtaý basqarmasy balanyń jaǵdaıy bir qalypty ekenin málimdedi.