Atyraý turǵyny kıik múıizderi men ańshy myltyǵyn zańsyz saqtap kelgen
Oblystyq polıtsııa departamenti baspasóz qyzmetiniń málimetine súıensek, zańsyz ispen aınalysqan turǵyn Qurmanǵazy aýdanynda turady.
«Qurmanǵazy aýdandyq polıtsııa bóliminiń qyzmetkerleri «Brakoner» jedel-profılaktıkalyq is-sharasyn júrgizip, zańǵa qaıshy áreketpen aınalysyp júrgen jergilikti turǵyndy ustady. Kúdikke ilingen 1998 jylǵy turǵynnyń 18 kıik múıizin, 16 kalıbrli «IJ» myltyǵyn jáne 7 dana oq-dárini zańsyz saqtaǵany anyqtaldy», - dep habarlady departamenttiń baspasóz qyzmeti.
Qazir QR Qylmystyq kodeksi 339-babynyń 1-bóligimen sotqa deıingi tergep-tekserý júrip jatyr. Ózge aqparat QR Qylmystyq-prtsestik kodeksiniń 201-babyna sáıkes jarııalaýǵa jatpaıdy.
Eske sala ketelik, budan buryn Atyraý oblysynyń turǵynynan 8 kıiktiń múıizi tárkilengenin jazǵan edik. Inder aýdany Syraly ýchaskesindegi qystaqtan kıikke uqsas janýardyń 8 dana múıizi tárkilendi. Kúdikti retinde 1958 jylǵy turǵyn ustaldy. Onyń Órlik aýylynda turatyny anyqtalǵan.
Keıin Atyraýda turǵyn úıden 2,5 myńǵa jýyq aqbóken múıizi tárkilendi. Atyraý qalasynyń «Bereke» shaǵyn aýdanyndaǵy turǵyn úılerdiń birinen jalpy salmaǵy 500 keliden asatyn 2 421 dana aqbóken múıizi tabyldy. Osyǵan baılanysty 1991, 1987 jáne 1986 jylǵy kúdiktiler anyqtalyp, ustaldy. Keltirilgen zalal quny 6 mlrd 264 mln teńgeden asady.
