Atyraý turǵyny qaýipti qylmyskerlerdi ustaýda erlik kórsetken
ASTANA. QazAqparat - Atyraý oblysynyń qylmystyq ister jónindegi mamandandyrylǵan aýdanaralyq soty qaraqshylyq shabýyl jasaǵan eki adamǵa qatysty úkim shyǵardy, dep habarlandy Joǵarǵy sottyń saıtynda.
Sotta anyqtalǵandaı, sottalýshylar M. jáne S. «Osa» tapanshasymen qarýlanyp, betterine bet-perde kıip jeke menshik úıge basa-kóktep kirip keledi. Sóıtip úı ishindegi 59 jastaǵy áıel adamnyń qol-aıaǵyn baılap, tapanshamen qorqytyp, úıdegi 23 030 965 teńge aqshany jáne jalpy quny 870 000 teńgeni quraıtyn altyn buıymdardy alyp, oqıǵa bolǵan jerden boı tasalaıdy.
Kómek shaqyrǵan jábirlenýshiniń daýysyn estigen kórshisi qaraqshylardyń sońynan kóligimen qýady. Sodan qolynda tapanshasy bar sottalýshy S.-ny ustap alyp, ony jaqyn mańda ótip bara jatqan áskerı bólimniń qyzmetshilerine tapsyrady. Al qashyp ketken ekinshi sottalýshy, jolda altyn buıymdar men 18 990 965 teńgeni jerge túsirip alady.
Biraq ol da kóp uzamaı polıtsııa qyzmetkerleriniń qolyna tústi.
Sot sottalýshylardy Qazaqstan Respýblıkasynyń QK-niń 192-babynyń 4-bóligi, 2-tarmaǵymen (asa iri mólsherde jasalǵan qaraqshylyq) kináli dep tanydy. Úkim boıynsha sottalýshy S. 10 jylǵa, al sybaılasy M.-nyń áreketinde qylmystyń qaýipti qaıtalanýyna baılanysty 10 jyl 6 aıǵa bas bostandyqtarynan aıyryldy. Sondaı-aq, olardyń dúnıe-múlki tárkilendi. Jábirlenýshiniń paıdasyna sottalýshylardan keltirilgen shyǵyn óndirildi.
Sonymen qatar, sot qaraqshylardy quryqtaý kezinde erlik kórsetip, batyldyq tanytqan jábirlenýshiniń kórshisin marapatqa usyný týraly Atyraý qalalyq ákimi men Atyraý oblystyq ІІD-ne bastyǵynyń atyna jekeshe qaýly shyǵardy.
Sot úkimi zańdy kúshine engen joq.
