Atyraý turǵyny qańǵybastardan 200 teńgeden alyp, úıin jalǵa berip kelgen
ATYRAÝ. QazAqparat - Atyraý polıtseıleri turaqty mekenjaıy joq adamdar arasyndaǵy qylmystyń aldyn alý úshin aýlalar men jylý júıeleriniń boıyn, sondaı-aq jertólelerdi tekserip jatyr. Aldyn alý jumystary «Ýchaske» sharasy barysynda júzege asty, dep habarlaıdy QazAqparat tilshisi.
Tek bir kúnniń ózinde áleýmettik beıimdeý ortalyǵyna 10 adam ornalastyryldy. Al jyl bastalǵaly bul mekemege 113 tulǵa jetkizilgen.
«Mundaı sanattaǵy tulǵalarǵa arnalǵan zańsyz jataqtardyń biri SMP-163 yqshamaýdanyndaǵy úıde ornalasqan. Úı qojaıyny jazda 10-nan astam adamdy qabyldaıdy. Polıtseıler kelgen kezde úı jaldaýshylar alkogoldi ishimdik iship otyrdy. Osyndaı otyrystardyń sońynda kórshiler «tynyshtyq bermedi» dep polıtseılerge jıi habarlasady. Jaldamaly úı turǵyndarynyń ózderi de keıde qylmystan zardap shegip jatady», - deıdi ýchaskelik polıtseıler.
«Jaz kezinde bir túnge qonyp shyǵý úshin árqaısysynan 200 teńgeden alamyn. Olar qujattaryn kórsetpeıdi jáne talap etýge meniń de kúshim jetpeıdi», - deıdi jetpisti alqymdap qalǵan úı ıesi.
Polıtseıler úı ıesine jaýapkershilikke tartylatyny jóninde kezekti ret eskertý jasap, memlekettik kirister organdaryna habarlady.
