Atyraý turǵyny 3 keliden astam bekire ýyldyryǵymen ustaldy
Oblystyq Polıtsııa departamentiniń baspasóz qyzmetinen málim etkendeı, bekire ýyldyryǵyn zańsyz saqtaǵan turǵyn Qaraózek aýylynda ustalǵan.
«Bekire tuqymdas baǵaly balyqtar qoryna zańsyz qol suǵýshylyqqa qarsy «Bekire – 2022» jedel-profılaktıkalyq is-sharasy kezinde Atyraý qalalyq polıtsııa basqarmasy men №1 qalalyq polıtsııa bóliminiń krımınaldyq polıtsııa bólimshesiniń qyzmetkerleri 34 jastaǵy turǵyndy ustady. Odan baǵaly bekire tuqymdas balyqtyń 3 keliden astam ýyldyryǵy tárkilendi», - dep habarlady departamenttiń baspasóz qyzmetinen.
Qazir atalǵan derekke qatysty QR Qylmystyq kodeksiniń 339-baby 2-bóligimen sotqa deıingi tergep-tekserý amaldary júrgizilip jatyr. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Budan buryn Atyraýda brakonerlerge qatysty 144 is sotqa joldanǵan edi. Jaıyq-Kaspıı oblysaralyq balyq sharýashylyǵy ınspektsııasynyń bas mamany Temirhan Ońaıbaevtyń málimetine súıensek, bıylǵy 6 aıda balyq qorǵaý zańnamasy talabyn buzýdyń 1 165 faktisi anyqtalǵan.
Osyǵan baılanysty 649 adamǵa qatysty ákimshilik quqyq buzýshylyq týraly hattama toltyrylǵan. Al 505 hattamaǵa qatysty is aýmaqtyq ýákiletti organda qaralsa, 144 is ákimshilik sotqa joldandy.
Foto: polisia.kz
