Atyraý turǵyny 15 jyl buryn satqan kóliginiń salyǵy men aıyppulyn tólep kelgen
Atyraý qalasynda turatyn 57 jastaǵy turǵyn «GAZel» avtokóligin 2008 jyly satyp jibergen.
Alaıda, sol kezden beri satqan avtokóliktiń salyǵy men aıyppulyn tólep kelgen.
«Sońǵy bes jyldan beri burynǵy kóligin óziniń ıeligindegi esepten shyǵarý úshin izdestirýge kirisken. Sóıtip, byltyr Atyraý oblystyq polıtsııa departamenti ákimshilik polıtsııa basqarmasynyń bastyǵy, polıtsııa podpolkovnıgi Rýslan Májıtovtiń qabyldaýyna kelip, shaǵym túsirgen. Polıtsııa qyzmetkerleri atyraýlyq turǵynnyń satqan avtokóligi Almaty oblysynyń Qaskeleń qalasynda ekenin anyqtady. Kólik burynǵy ıesiniń esebinen shyǵaryldy. Al, qazirgi ıesi 800 myń teńge salyǵy men aıyppuldaryn óteýge kelisip otyr», -dep habarlady departamenttiń baspasóz qyzmeti.
Eske sala ketelik, budan buryn Atyraýda aıyppuly tólenbegen sheteldik tirkeýdegi kólikter arnaıy turaqqa jetkizilip jatqanyn habarlaǵan bolatynbyz.
«Atyraý qalalyq polıtsııa basqarmasy jedel basqarý ortalyǵynyń beınebaqylaý qyzmetkerleri jergilikti ýaqytpen 12:55 shamasynda «Interceptor» izdeý júıesi arqyly Grýzııa Respýblıkasynda tirkeýde turǵan «Chevrolet» markaly avtokóliginiń qozǵalys baǵytyn anyqtady. Óıtkeni, bul kóliktiń júrgizýshi birneshe aıyppulyn tólemeı júrgen boryshkerlerdiń tiziminde tur. Sol sebepten, patrýldik polıtsııa kólikti toqtatty. Tekserý kezinde júrgizýshiniń tólenbegen 37 aıyppuly bary belgili boldy, kólemi 900 myń teńgeden asady», - dep habarlaǵan edi departamenttiń baspasóz qyzmetinen.
