Atyraý turǵyndarynan «Berekeli bastama» baǵdarlamasyna 45 usynys túsken

ATYRAÝ. QazAqparat – Atyraý turǵyndarynan «Berekeli bastama» baǵdarlamasyna 45 usynys túsken. Bul týraly Atyraýǵa kelgen Indýstrııa jáne ınfraqurylymdyq damý mınıstri Qaıyrbek Óskenbaev málim etti, dep habarlaıdy QazAqparat.

Qaıyrbek Óskenbaev «Q88» ýrbanıster qaýymdastyǵy men jergilikti atqarýshy organ ókilderimen birge Atyraý qalasyn damytý máselesin talqylady.

Mınıstrdiń aıtýynsha, qalalardyń ınfraqurylymyn jaqsartýdy kózdeıtin «Berekeli bastama» baǵdarlamasy iske qosylǵan.

«Atyraý – jańa baǵdarlama iske qosylǵan alǵashqy qalalardyń biri. Jergilikti turǵyndardan eldi-mekenniń ınfraqurylymyn jaqsartý jóninde 45 usynys tústi. Turǵyndardyń daýys berýi arqyly eń ózekti bastamalar tańdalady. Eń kóp daýys jınaǵan jobalar qalany damytý jónindegi Jol kartasyna engiziledi», -dedi Qaıyrbek Óskenbaev.

Mınıstrdiń málimetinshe, Q88 ýrbanıster qaýymdastyǵymen birlesip qala qurylysy, qalalardy damytý jáne ınklıýzıvti orta qurý máseleleri boıynsha zańnamany jetildirý kózdelgen.

«Osy baǵytta aýmaqty keshendi damytý standarttarynyń jınaǵy daıyndalyp jatyr. Oǵan 6 kitap pen 4 katalog kiredi. Jınaqty osy jyldyń jaz aılarynda shyǵarý josparlanyp otyr. Jumys aıaqtalǵannan keıin qujatqa vedomstvolyq buıryq negizinde qol qoıylady», -dedi mınıstr.

Eske sala ketelik, budan buryn Atyraý qalasyn damytý qalaı iske asatynyn habarlaǵan edik.