Atyraý turǵyndaryna 1 myń dana «Jeńis» lentasy taratyldy
«Jeńis» lentasyn taratý aktsııasyn Atyraý qalalyq jastar resýrstyq ortalyǵy uıymdastyrdy.
Lentada qazaq halqynyń ulttyq oıý-órnegi men «Otan soǵysy» ordeni beınelengen. Lentanyń túsi – aspan tústes kók.
Bul – táýelsiz Qazaqstan Respýblıkasynyń Týymen tústes lenta.
Atalǵan ortalyq jetekshisi Serik Qadyrovtyń aıtýynsha, Atyraý qalasynda «Jeńis» lentasyn taratý úshin birneshe oryn tańdalǵan.
Ortalyq belsendileri lentany munaıly shahardyń «Avangard» shaǵyn aýdanynda ornalasqan sońǵy aıaldamada, temirjol vokzaly men «Isataı-Mahambet» ortalyq alańynda, qaladaǵy iri saýda-oıyn saýyq ortalyqtarynda taratty.
«Bul lenta – Ekinshi dúnıejúzilik soǵystaǵy Jeńistiń sımvoly. Óıtkeni, bizdiń atalarymyz da qan maıdanda qar keship, muz jastana júrip, jaýmen shaıqasty. Onyń ishinde maıdan dalasynda qaza tapqandary da, Jeńis kúnin Berlınde, Eýropanyń ózge qalalarynda qarsy alǵandary da bar. Otandy qorǵaýdyń úlgisin tanytqan aǵa urpaqtyń erligin umytpaýymyz qajet. Bul – otanshyldyqtyń jarqyn úlgisi», - deıdi ortalyq jetekshisi Serik Qadyrov.
Turǵyndarǵa «Jeńis» lentasyn taratýshynyń biri – qala turǵyny Samal Tasqynbaeva.
Ol jyl saıyn Jeńis kúninde maıdanda qazaq tapqan bozdaqtardyń rýhyna taǵzym etý úshin «Máńgilik alaý» monýmentine keledi.
«Biz búgingi beıbit kúnimiz úshin maıdan dalasynda opat bolǵan bozdaqtardyń rýhyna máńgi qaryzdarmyz. Jyl saıyn osy lentany qolyma ustaǵanda, janymdy qoıarǵa jer tappaımyn. Óıtkeni, maıdan dalasynan oralmaǵan bozdaqtar bolashaq urpaǵynyń beıbit ómiri úshin janyn qıdy ǵoı. Keıbiriniń artynda urpaq ta qalmady. Sol sebepten, biz qan maıdanda qaza tapqan qazaq jaýyngerleriniń qaıtalanbas erligine, óshpes rýhyna bas ıip, qurmetimizdi kórsetýimiz kerek. Búgin «Jeńis» lentasyn ákeme de ákelip berdim», - deıdi Samal Tasqynbaeva.
Eske sala ketelik, budan buryn bala kezinde kontslagerde tutqynda bolǵan 91 jastaǵy keıýana Atyraýda turatynyn habarlaǵan bolatynbyz.
