Atyraý turǵyndary jylýǵa artyq tólegen 11,6 mln teńgesin keri qaıtaryp alady
Tabıǵı monopolııalardy retteý komıteti Atyraý oblysy boıynsha departamentiniń málimetinshe, tutynýshylardyń jylý úshin artyq tólem tólegeni anyqtalǵan.
«Syrtqy aýanyń naqty temperatýrasy eskerilip, «Jylyoı Sý» MKK, «Imanalın» JK, «Qaladaǵy turǵyn úılerge kommýnaldyq qyzmet kórsetý» JShS, «Atyraý oblysy Sý Arnasy» KMK men «Atyraý jylý elektr ortalyǵy» AQ-nyń jylýmen jabdyqtaý qyzmetiniń qunyn qaıta esepteý esebin qarady. Bul kásiporyndar Atyraý oblysynda jylý energııasyn óndirý, berý, bólý jáne jabdyqtaý boıynsha qyzmetter kórsetedi. Jylytý kezeńinde jetkiliksiz jylý berý deregi anyqtaldy. Al turǵyndar tólemi tólengen. Endi kásiporyndar qarajatty adamdarǵa qaıtarý úshin tólem somasyn azaıtýy kerek», -dep habarlady departamenttiń baspasóz qyzmeti.
Óńirlik departamenttiń mamandary 2022-2023 jyldardaǵy jylytý maýsymynyń tólemin qaıta eseptedi.
Onyń qorytyndysymen tutynýshylarǵa qaıtarylatyn tólemniń somasy qosymsha qun salyǵy esebimen 11 mln 640 myń 572 teńgeni quraǵan.
«Onyń ishinde «Atyraý jylý elektr ortalyǵy» AQ jalpyúılik jylý esepteý aspabynsyz 6 795 954,18 teńge, eski, apatty úılerde 3 349 271,3 teńge, «Qaladaǵy turǵyn úılerge kommýnaldyq qyzmet kórsetý» JShS Nursaıa shaǵyn aýdany úshin 539 830,70 teńge, Juldyz shaǵyn aýdanyna 64 317,01 teńge, «Atyraý oblysy Sý Arnasy» KMK — Atyraý qalasynyń 1-ýchaskesine 291 084,30 teńge, Qurmanǵazy aýdanyna 43 224,16 teńge, Isataı aýdany úshin 377 537,10 teńge qaıtarady. Al, «Jylyoı Sý» MKK 176 119,10 teńge, «Imanalın» JK 3 234,56 teńge qaıtarýǵa tıis. Qaıta esep jasaý esepteý quraldary joq tutynýshylar úshin esepteledi. Artyq somany qaıtarý túbirtektegi tólemdi azaıtý arqyly júzege asyrylady», -dep málim etti departamenttiń baspasóz qyzmetinen.
Eske sala ketelik, budan buryn Atyraýda jylýdyń baǵasy 22,5 paıyzǵa óskenin jazǵan edik.
