Atyraý turǵyndary Jaıyq ózenin ólgen balyqtardan tazartty
ATYRAÝ. QazAqparat - Atyraýda Jaıyq ózeninen óli balyqtardan tazartý sharasy uıymdastyryldy. Tazalyq jumystary qalanyń 4 bóliginde júrgizildi, dep habarlaıdy QazAqparat.
Búgin Atyraý oblysynyń quzyrly organdary qalyń kópshilikpen birlesip, Jaıyq ózenin óli balyqtardan tazartty. Bul joly ekologııalyq sharaǵa mamandarmen qatar Atyraý qalasynyń turǵyndary - jastar, qoǵamdyq uıymdardyń músheleri men eriktiler de qatysty.
«Tazalyq jumystaryna qatysýǵa nıet bildirgenderge aldyn ala TJD ınspektorlary jumysty qalaı atqarý qajettigi jóninde nusqaý berdi. Jumys tańerteńgi saǵat 10.00-de bastalyp, túske deıin jalǵasty. Bastapqy qorytyndylar boıynsha 20 qapqa jýyq balyq jınaldy. Jergilikti turǵyndar bolsa, tazalyq jumystarymen analysyp jatqan eriktilerdi tamaqpen, sýsyndarmen qamtamasyz etti. Eýropalyq bólik boıynsha ózen jaǵalaýyn tazalaý úshin 4 jınalý orny belgilendi: aınalma kópirden AHAJ aýdanyndaǵy kópirge deıin, AHAJ kópirinen Álıev kópirine deıin, AMÝ ýnıversıteti aýmaǵynan Turǵyndar qalashyǵyndaǵy kópirge deıin jáne Turǵyndar qalashyǵynan Balyqshy yqsham aýdanyna deıin»,- deıdi ýcheskeniń úılestirýshisi Meıramgúl Esnııazova.
«Bul - álemdik tájirıbe. Mysaly, Meksıka shyǵanaǵynda munaı tógilgen kezde jaǵalaýdy óli balyqtan tazartýǵa jergilikti turǵyndar men fermerler qatysty. Búgin bizde de jurtshylyq jaǵaǵa shyǵyp, ózendi óli balyqtardan tazalaýǵa nıet bildirdi. Jaıyq jaǵasyndaǵy qaýipsizdik sharalaryn TJ departamenti, «Arnaýly avtobaza» ókilderi qamtamasyz etti. Júzdegen belsendi turǵyndar jaǵalaýdy óli balyqtan tazartýǵa qatysty»,- deıdi uıymdastyrýshy-eriktilerdiń biri Shynar Іztileýova.
Oblystyq balyq sharýashylyǵy basqarmasynyń basshysy Artýr Sádibekulynyń aıtýynsha, óli balyqtardy jınaý jumysy aıaqtalǵannan keıin balyqty baqylaý maqsatymen ólsheý jumysy júrgiziledi jáne qortyndysy BAQ-ta jarııalanady. Eki kúnniń ishinde 493 kg óli balyq jınalǵan.
«Tazalyq jumystary Jaıyq ózenindegi muz tolyq erigenge deıin jalǵasady. Bul bastamaǵa qýanyshtymyz. Adamdardyń tabıǵatqa, Jaıyqqa degen janashyrlyǵyn, qoldarynan keletin kómekterin aıamaıtynyn kórdik», - deıdi Artýr Sádibekuly.
Vedomstvoaralyq komıssııa músheleri atap ótkendeı, aldaǵy kúnderi ózen muzdan tolyqtaı tazarady, arnany tazartýmen balyq aýlaý kooperatıvteriniń tájirıbeli mamandary aınalysady.
Aıta keteıik, balyq jınaý jumysyna jalpy sany 150-ge jýyq atyraýlyq qatysty. Barlyq jınalǵan balyqtar sanalyp, qylmystyq is materıaldaryna tirkeledi, sodan keıin «Arnaýly avtobaza» JShS polıgonynda joıylady.
Balyqtardyń qyrylýyna qatysty eki qylmystyq is qozǵalǵan bolatyn. Qazir tekserý jumystary júrip jatyr, kináliler jazalanatyn bolady. Polıtsııa qyzmetkerleri men veterınarlar balyq ónimderin satatyn saýda núktelerin baqylaýda ustap otyr. Ekologter kún saıyn Jaıyq ózeninen synama alýda. Turǵyndar arasynda balyqtan nemese sýdan ýlaný derekteri tirkelgen joq
